Татабари тухай буряад хэлэн дээрэ хөөрэхэ

Холбоото уласай татабариин албанай Буряад Уластахи хүтэлбэриин үүсхэлээр тус хэмжээ ябуулга эмхидхэгдээ. Мүрысөөн хадаа буряад хэлэ хүгжөөхэ, буряад хэлэн дээрэ татабариин асуудалнуудаар телевиденидэ ба радиодо ойлгууламжын ажал ябуулха, мэргэжэлтэдые элирүүлхэ гэһэн зорилготой.

Уласай «Бэлиг» түбэй захирал Баир Балданов, «Бурятия» телерадиокомпаниин мэдээсэлэй программануудай албанай хүтэлбэрилэгшын орлогшо Дарима Жамсоева, «Бурятия» телерадиокомпаниин  радио-субагай хүтэлбэрилэгшэ Галина Михайлова гэгшэд хабаадагшадые сэгнэбэ.

«Радиодо татабари тухай буряад хэлэн дээрэ» ба  «Теле-субагаар татабари тухай буряад хэлэн дээрэ» гэһэн конкурсын янзануудта хабаадаха хүсэлтэй байһанаа 13 хүн мэдүүлээ. Мүрысөөнэй 1-дэхи шатада хабаадагшад буряад хэлэн дээрэ өөр тухайгаа хөөрэхэһөө гадна албан ажалай текст, шүлэг, прозо уншаа. Түрэл хэлэеэ һайнаар мэдэхэ байһан тула тэдэ булта  2-дохи шатада гаража шадаа. Тиихэдэ хабаадагшад шүүгшэдтэй буряад хэлэн дээрэ харилсаа, хизаар оронойнгоо түүхэ, үндэһэтэнэй хубсаһанай зүйлнүүдэй удха тухай хөөрөө, оньһон үгэ, жороо үгэнүүдые хэлээ, таабаринуудые таагаа.

Мүрысөөнэй дүнгүүдээр «Радиодо татабари тухай буряад хэлэн дээрэ» янзада Виктория Цырендоржиева 1-дэхи һуури эзэлээ. Саяна Цындымеева 2-дохи һуурида, Ханда Намсараева ба  Баира Борохитова гэгшэд 3-дахи һуурида гараба. «Теле-субагаар татабари тухай буряад хэлэн дээрэ» янзада Бутид Цыренова илаба, Ольга Дашинимаева шангай 2-дохи һуурида гараба, харин Светлана Бадмаева, Алдар Базаров  гэгшэд 3-дахи һуури эзэлээ.

Уласай «Бэлиг» түбэй урмашуулгын шангуудта Туяна Лайдапова, Эржена Омхонова, Юрий Сотников, Аюна Матуева ба Марина Доржижапова хүртөө.

Жюриин гэшүүдэй тэмдэглэһээр, мүрысөөн үндэр хэмжээндэ үнгэргэгдөө, хабаадагшад буряад хэлэеэ һайнаар мэдэхэ байһанаа гэршэлээ. Хэмжээ ябуулга саашадаа үргэлжэлхэ бэзэ гэжэ шүүгшэд найдана.

Баир Балдановай тэмдэглэһээр, Буряад орондо холбоото уласай нэгэшье эмхи зургаан иимэ мүрысөө үнгэргэжэ үзөөгүй. Хэмжээ ябуулга мэдээсэлэй ба ойлгууламжын ажалай янзануудые үргэдхэхэһээ гадна буряад хэлэ дэлгэрүүлхэ, үндэһэтэнэй ёһо заншал бэхижүүлхэ хэрэгтэ нүлөөлнэ гэжэ тэрэ онсолоо.