Монгол гүрэндэ Георгий Жуковай хүшөөдэ баглаа сэсэгүүд табигдаба

Апрелиин 23-да Монголой ниислэл Улаан-Баатарта уласхоорондын баяр ёһолол үнгэргэгдэбэ. Советскэ Союзай маршал, Советскэ Союзай 4 удаа Герой Георгий Константинович Жуковай хүшөөдэ баглаа сэсэг табиба. Хэмжээ ябуулгада Буряад Уласай делегации хабаадаа. Тэрэнэй бүридэлдэ 30 гаран оюутан, тусхай дунда мэргэжэлэй эмхи зургаануудай захиралнууд ороо.

"Манай оюутад сэрэгэй гайхамшагта хүтэлбэрилэгшын дурасхаал хүндэлхэ аргада хүртэхэһээ гадна залуушуулые Эхэ орондоо дуратайгаар хүмүүжүүлхэ зорилготой хэмжээ ябуулгада хабаадаба. Иимэ үйлэ хэрэгүүд хамтын түүхэ тухай һануулна, Россиин ба Монголой арадуудай хани барисаа бэхижүүлнэ ,- гэжэ тусхай дунда мэргэжэлэй захиралнуудай Зүблэлэй түрүүлэгшэ Олег Якимов хэлэбэ.

Буряад Улас заншалта ёһоороо болбосоролой, соёлой, тамирай, хүдөө ажахын болон бэшэшье һалбаринуудта Монгол гүрэнтэй нягта холбоотой.

Буряад орон ба Монгол хамтын түүхэтэй. Агууехэ Эсэгын дайнай түрүүшын үдэрнүүдһээ хүршэ Монгол гүрэн Советскэ Союзые дэмжэжэ, алишье талаһаа туһа хүргэһэн байна.

"Монгол арад 1939 оной Халхын Голой байлдаануудай түүхэ һайн мэдэдэг. Георгий  Жуковай ударидалга доро монгол- совет арми милитарис Япониин сэрэг бута сохиһон байна. Энэ илалта Агууехэ Эсэгын дайнай түүхэдэ онсо удха шанартай",- гэжэ Селенгинск тосхоной Политехническэ техникумай оюутан Артем Гроздов хэлэбэ.

Улаан-Баатарта болоһон хэмжээ ябуулга Буряад Уласай Толгойлогшо Алексей Цыденовэй үүсхэлээр эмхидхэгдэжэ, Агууехэ Эсэгын дайнай илалтада зорюулагдаа.