Эдир сэдхүүлшэдэй эрмэлзэл ехэ

Байгша ондо “Алтан гуурһан” гэжэ урилдаан табан шэглэлээр зарлагдаһан байна. Буряадааршье бэшэгдэһэн хүдэлмэринүүд жюриин анхаралда эльгээгдээ. Энэ ехэ һайшаалтай. “Толотомо Толто” гэжэ гаршаг доро бидэ Түнхэнэй Толтын һургуулиин шаби Саяна Сотниковагай хүдэлмэри “Буряад үнэн” сониндоо декабриин 8-ай дугаарта ниитэлүүлээ һэмди. Тэрэ һурагша 3-дахи һуурида гаража шадаа гээд дуулганабди.

Һургуулиин газетэнүүдые “Бурятия” сониной редактор Светлана Намсараева шэнжэлэн хараад, эгээл һонин сонинуудтай һургуулинуудые нэрлээ – Яруунын Нарһатын “Экспресс школы”, Улаан-Үдын 50-дахи һургуулиин “Полсотка”, Тарбагатайн Доодо-Саянтын “Импульс”, Хурамхаанай “Школьные вести”.

Шэнжэлхы удхатай хүдэлмэринүүдые Людмила Доржиева өөрөө сэгнээд, Улаан-Үдын 26-дахи һургуулиин 11-дэхи ангиин шаби Елизавета Качинада түрүү һуури олгуулаа. Гадна Команденко Роман, Санжиева Баирма, Алтана Санжиева, Аяна Санжиева, Виктория Тумурова, Янжима Цырендоржиева гэгшэдые онсо тэмдэглэбэ.

 

 

Жэл бүри жюриин гэшүүдэй бүридэлдэ оролсодог Буряадай журналистикын ветеран Анатолий Базархандаевай тэмдэглэһээр, үхибүүдэй нюдөөр дэлхэйн һайханиие хараалһан хүдэлмэринүүд байба. Зарим һургуулинуудай үхибүүдэй “гуурһа” танимаар байна.

Тележурналист Илья Кошлюнов баһал жюриин бүридэлдэ байжа, иигэжэ тэмдэглэбэ: “Энэ урилдаанай хэмжээн соо зураглал бэшэхэдээ гү, али ролик буулгахадаа,  оролдолго гарган олоһон эрдэм мэдэсэнь үхибүүдтэ хожом хойнодоо хэрэгтэй, туһатай байха”. 

Һургуулиин хэблэлэй албануудай дундаһаа Гусиноозёрск хотын 4-дэхи һургуулиин пресс-албан (хүтэлбэрилэгшэнь Соелма Абидуевна Эрдынеева) түрүүлбэ. Урагшаа һанаатай, бэлигтэй бэрхэ үхибүүд тэрэ түбтэ гансашье сонин хэблүүлдэг бэшэ, мүн һонирхолтой ролигуудые бэлдэдэг юм. Эдэ үхибүүд “Алтан гуурһанда” хабаадаха зуураа уласхоорондын хэмжээндэ “Волжские встречи-32” гэжэ урилдаанда ажалнуудаа эльгээгээд, урилгада хүртэбэ. Январиин 4-дэ тэдэнэр Казань хото ниидэхэнь. Энэ ехэ амжалта гээшэ.

Урилдаанай дүнгүүдээр Людмила Будажаповнагай тэмдэглэһээр, һургуулиин сонинууд хэдыхэн багшанарай хүсэ оролдолгоор лэ үргэлжэ хэблэгдэжэ байна. Гэбэшье зарим аймагуудай нэмэлтэ һуралсалай түбүүдтэ медиапедагогой тушаалнууд байгуулагдажа эхилээ. Энэ ехэ найдал түрүүлнэ.

Урилдаанда оролсожо түрүүлһэн үхибүүдтэ дипломууд, үнэтэ бэлэгүүд барюулагдаа. Гуурһаяа орхингүй, улам саашань мүлиһөөр байтараа, нэрэтэй солотой сэдхүүлшэд тэдэнэй дундаһаа гарахал байха.