​Олзо оршо оруулна

Эмхидхэгшэдэй нэгэн Хамниин дунда һургуулиин захирал Сергей Цыренов болоно. Энэ түсэл бага һууринуудай залуушуулда өөрынгөө хэрэг эрхилхэ хэрэгтэнь туһалха зорилготой гэжэ тэмдэглэлтэй. Захааминай аймагай Хамни, Бүргэ, Үлэнтэ нютагай 16-35 наһа хүрэтэр залуушуул эндэ хабаадаба.

- Мүнөө сагта хүдөө һууринай залуушуул олзын хэрэг эрхилжэ, өөһэдыгөө хангаха хэрэгтэ яһала оролдоно. Тэдээндэ туһалха зорилготойгоор «Мой бизнес - моё дело» гэһэн хуралдаан ябуулагдаа. Хэдэн багахан эмхинүүдые нэгэдхэхэ, мүн саарһа дансаяа яажа бэлдэхэб гэһэн удхатай һурган хүмүүжүүлгын аша туһатай хэшээлнүүд үнгэргэгдөө. Тус семинарай һүүлдэ нэгэ залуу хүн өөрын эмхи байгуулаа, - гэжэ Хамниин һургуулиин захирал Сергей Цыренов тэмдэглэнэ.

«Спортивная» ТОСой гэшүүд хун сагаан хонинойнгоо нооһо үйлэдбэрилжэ, дулаан хубсаһа, бээлэй, сээжэбшэ гэхэ мэтые урладаг болонхой. Юрэнхылэгшын грантын ашаар үйлэдбэриин хэрэгсэлнүүд абтаа. Хуралдаанда хабаадагшад өөрынгөө гараар бүтээһэн эд хэрэгсэлнүүдые асаржа, олоной һонорто дурадхаа. Хүдөө һууринай залуушуул ажалтай боложо, олзо оршо оруулжа байхадань, урматай даа.