Хүйтэндэ хүнүүдые эмшэлхэнь

Тус хэмжээ ябуулгада хабаадаһан нютагай зоной тэмдэглэһээр, һая наашадаа иимэ түб нээгдэхэ гэжэ ухаандаашье оруулаагүй ябаабди. Хорото ковид үбшэнэй дэлгэрһэн мүнөө сагта бэеэ эмшэлүүлхэ газар Хүйтэндэ тон хэрэгтэй болоод байгаа. Бүхы байра байдалаа, үхэр малаа орхёод, даб гээд Улаан-Үдэ даралдахаар бэшэ. Бэеэ амаруулха курортнуудшье холо ха юм. “Байгалай элүүржүүлгын түб” нээгдэжэ, бэеынгээ шалаа гаргуулха мэргэжэлтэнтэй, банитай, элүүржүүлгын зүргэтэй болоо. Тус байгуулга эмхидхэгшэ ниитын ехэ ажал ябуулагша Владимир Марковай дуулгаһаар, энэ түб нээхын урда тээ бэлэдхэлэй ажал хэгдээ – байшангынь заһабарилагдаа. Арадай аргашан Елена Алексеевна Коноваловагай үбгэн абын гэрэй һуури дээрэ түрүүшынгээ түбые бодхоожо шадаһамнай удха шанартай. Энэ байрамнай шажанай ёһоор арамнайлагдаа. Бусад аймагуудта саашадаа иимэ түбүүд мүн лэ нээгдэхэ юм. Ямар арга эндэ нэбтэрүүлэгдэхэб гэжэ арадай аргашан Елена Коновалова харуулаа. Өөрынгөө гараар хэһэн эм домуудтаяа танилсуулаа. Сэдьхэлыень зобоодог асуудалнуудые нютагаархид эмшэндэ табяа. Тиихэдээ гансашье хубиин тала хараһан асуудалнуудые бэшэ, мүн нютагайнгаа бэрхэшээл бодхоогоо. Хүйтэнөөрхин Соёлой байшангаа һэльбэн шэнэлүүлхэ хүсэлтэй байна. Владимир Марковай тэмдэглэһээр, элүүржүүлгын түбүүд Загарайн аймагай Онохой-Шэбэртэ, Хара-Шэбэртэ байгша ондо байгуулагдахаар түсэблэгдэнэ. Шулуутын дасанай дэргэдэ бодохо түбэй дэргэдэ эмтэй домтой булаг, шабаршье бии юм.