Ажалшадынь квартиратай болохо

Заводой нээлтын баяр ёһололдо Буряад Уласай Толгойлогшо Алексей Цыденов болон Улаан-Үдэ хотын мэр Игорь Шутенков хабаадалсажа, ажалшадые амаршалба. Уласай Толгойлогшын хэлэһэнэй ёһоор, домостроительна гэхэ гү, али байшан гэрнүүдые барилгын комбинат байгуулга хүгжэлтын үшөө нэгэ шухала алхам.

– Хүнүүдые һайн шанартай, ехэ үнэтэй бэшэ гэр байраар хангаха гэһэн зорилго урдамнай табигдана. Энэ комбинат сагай уларилһаа дулдыдахагүй, бүхэли жэл соо панельнүүдые үйлэдбэрилжэ байха. Тиимэһээ барилгын хаһа һунаагдаха. Энэ үйлэдбэридэ ехэ һайн эрхэ нүхэсэл дурадхагдана – табан жэл соо комбинадта хүдэлһэн бүхы ажалшад нэгэ таһагтай квартирада хүртэхэ юм. Ажалай иимэ һайн нүхэсэл дээдэ гарай мэргэжэлтэдые хабаадуулжа шадаха, ажалай үрэ дүнгые эрид дээшэлүүлхэ, – гэжэ Алексей Цыденов тэмдэглээ.

Байшан гэр барилгын комбинадай захирал Владимир Хусаевай хэлэһээр, ажалшадта квартира үгэхэһөө гадна түлбэригүй эдеэгээр хангаха юм. Гадна ажалай газар хүрэтэр шэрэхэ автобус байха. Ондоо аймагуудһаа ерэһэн хүдэлмэрилэгшэд хамтын байрада байрлаха, ажалай мэргэжэлнүүдтэ түлбэригүй һураха аргатай. Энэ ушараар ССУЗ-уудтай хэлсээнүүд баталагдана.

“Манда ерэжэ, ажалда орогты. Табан жэл хүдэлһэнэй удаа квартиратай болохот. Ямаршье ипотекэ абаха хэрэггүй бшуу”, – гэжэ Владимир Хусаев хэлэнэ.

 Гэрнүүдые барилгада гүрэнэй талаһаа дэмжэлтэ үзүүлэгдэхэ гэжэ Буряад Уласай Толгойлогшо нэмэжэ хэлэбэ.

– Гэр байрануудай дуталдаһан ушарһаа хүнгэлэлтэтэй ипотекэ үгэхэ аргаар гүрэнэй дэмжэлгэ бии. Алас Дурнын ипотекэдэ зарим хубилалтануудые оруулхаар боложо байна. Хэрбэеэ 2 процентын хэмжээтэй Алас Дурнын ипотекэ 35 хүрэтэр наһатай зон абаха эрхэтэй гээшэ һаань, мүнөө хэдышье наһанай багшанар болон эмшэд тэрэниие абаха арга боломжодо хүртэхэ. Шэнэ гэрнүүдэй дэргэдэ ниигэмэй удха шанартай объектнүүд, харгынууд баригдаха, ниитын унаануудай асуудал шиидхэгдэхэ, – гэжэ Алексей Цыденов тэмдэглээ.

Буряад Уласай Засагай газарай, Улаан-Үдэ хотын захиргаанай болон «Бургражданстрой» ООО-гой хоорондо хэлсээ баталһанай дүнгөөр байшан гэр барилгын комбинат байгуулга 2020 ондо эхилээ һэн. 2031 он болотор гэр байрын 1 сая тухай дүрбэлжэн метр ашаглалда тушаагдахаар хараалагдана. Мүнөөдэрэй байдалаар тус комбинадта 160 хүн ажалда ороо. Дүн хамта 182 хүн хүдэлхэ юм. Комбинат нэгэ үдэрэй халаанда хоёр подъездтэй 16 дабхар байшан гэрэй нэгэ дабхарые үйлэдбэрилхэ хүсэ шадалтай. Тодорхойлбол, үдэрэй 60 панель хэгдэхэ.

– Би ехэ баяртай байнаб. Улаан-Үдэ хотодо промышленна шэнэ үйлэдбэри- гэр барилгын компани бии болобо. Энээнэй ашаар 148- дахи кварталда оройдоол хоёр жэлэй туршада олон квартиратай 10 байшан гэр бодохо. Улаан-Үдэ хотын зүүн-урда зүгтэ 10 жэлэй туршада зургаан шэнэ квартал ашаглалда тушаагдаха. Дүн хамта дээрээ 1 сая дүрбэлжэн метр болоно, – гэжэ Игорь Шутенков тэмдэглээ.

Улаан-Үдэ хотын захиргаанай болон барилгын компаниин хамтаран ажаллаха хэлсээнэй ёһоор, Октябрьска хороондо 146, 146Б, 148, 148А, 148Б, 162 микрорайонууд баригдаха. Энэ ехэ барилга ябуулха компанида газар үгтэнхэй. 2021 оной октябрь һарада газар дэбисхэрэй проект баталагдаһан байна.

Буряад Уласай Засагай газарай пресс- албанай мэдээсэлээр