Шог зугаагаа Москвада дэлгэхэнь

“Бохан” болон “Дети Прибайкалья” команданууд 2021 ондо Анапада үнгэргэгдэһэн КВН фестивальда амжалтануудые туйлажа, мүнөө жэлэй наадануудта хабаадаха болонхой. Тэдэнэй наадануудые бүхэроссиин теле-субагуудаар харуулхаар хараалагдана. “Бохан” гэһэн команда тойрог дотороо мэдээжэ юм. Үшөө 2017 ондо тэдэ Эрхүү можын чемпионууд болоһон байна. 2021 ондо тус амжалтаяа дабтажа шадаа. Хоёр жэлэй саада тээ Боохоной үхибүүд СТС теле-субагай дамжуулгада оролсоо һэн. “Детский КВН” гэһэн наадан мартын 28 - апрелиин 1-эй үдэрнүүдтэ үнгэргэгдэхэ. Дүрбэн нааданда 32 команда хабаадаха. Эдэ наадануудые 1-дэхи каналаар харуулха гээд, эмхидхэгшэд мэдүүлнэ. 2021 ондо энэ түсэл телевизорээр 12 сая харагшад хараа гээд тэмдэглэлтэй. Оһын аймагай Бэлшэр һууринда “Дети Прибайкалья” команда (зураг дээрэ) 2021 ондо байгуулагдаа һэн. Түрүүшын үдэрһөө 7-12 наһатай хүбүүд, басагад олониие гайхуулжа эхилээ. Декабрь һарада тэдэ бүхэроссиин лигын наадануудта шангай 3-дахи һуури эзэлжэ, олон тоото нютагаархидаа баярлуулаа. Шэнэ халаанда тэдэ бүри һайн дүн харуулхаяа бэлэдхэл хэнэ. КВН-эй бүхэроссиин юниор-лигэдэ мүнөө жэлдэ 12 команда оролсохоор түсэблэгдэнэ. Белгород, Краснодар, Самара, Москва гэхэ мэтэ томо хотонуудай командануудай дунда “Дети Прибайкалья” хабаадаха юм. Апрелиин 23-да хахад финалай нааданууд буулгагдаха. Эдэ хоёр командые шадамар бэрхээр Чингиз Матхалов хүтэлбэрилнэ гээд хэлэлтэй. Усть-Ордын бэлиг шадабаритай, шог зугаатай үхибүүдтэ амжалта хүсэе!