Арьяа Баалын рамнай

Захааминай аймагай түлөөлэгшэд, тэрэ тоодо Санагын дасанай Сультим лама, “Нэгэдэл” гэһэн ниитын жасын түлөөлэгшэд Баир Жамьянов, Лариса Ардаева гэгшэд хамба лама Дамба Аюшеевые бараалхажа, энэ хүрэгэй нээлтын үдэрые хэлсээ һэн. Мүнөө дээрээ энэ рамнайда хэрэгтэй болохо шүн бүтээлгэдэ хүн һүзэгтэн хаа-хаанагүйһөө үргэл хэнэ. Февралиин 12-то Захааминай аймагай засаг даргын орлогшо Сэсэгма Намдаковагай хүтэлбэри доро 41 метртэй Арьяа Баала бурханай хүрэгэй нээлтын программа зүбшэн хэлсэгдэбэ. Энэ суглаанда Санага нютагай Соёлой байшангай уран һайханай хүтэлбэрилэгшэ Борис Тарбаев, ниитын ажал ябуулагша Николай Тарбаев болон соёлой ажалшад суглараа.

– Арьяа Баалын рамнай бүтээһэнэй удаа хүшөөгэй нээлтэдэ зорюулагдаһан найр болохо. Олон хүн сугларха. Захааминай аймагай түүхэдэ зорюулагдаһан үзэсхэлэн дэлгээгдэхэ, эндэ ажаһуудаг арад зон, үндэһэ яһатан, соёл тухай танилсуулганууд болохоор хараалагдана. Эгээл шухалань гэхэдэ, Санагын дасанда ерэһэн айлшадта, һүзэгшэдтэ бурхан багшадаа мүргэл хэжэ, буян хуряаха бүхы эрхэ нүхэсэл зохёогдохо болоно, – гэжэ аймагай засаг даргын орлогшо Сэсэгма Намдакова хэлээ.