Онлайн аргаар сагаалба

Агада жэлээ оруулжа байһан үетэн Сагаалганайнгаа тоглолто даажа абадаг. Тэдэнэр өөһэдын хүсөөр уран һайханай наада табижа, нютаг зоноо баярлуулдаг заншалтай юм. Тэрэнэй хажуугаар жэлээ оруулжа байһан нэгэ ангиин түлөөлэгшэд амаршалгын видеоролик бэлдэжэ, тэрэнээ Интернедээр үргэн тарааха һонирхолтой ажал ябуулдаг. Тоглолтодо бэлдэхэдээ, хүн бүхэн өөрынгөө уран шадабарияа, абьяас бэлигээ харуулха гэжэ оролдолго гаргадаг. Үндэһэн буряад хубсаһа өөртөө тааруулжа оюулха, худалдажа абаха гэжэ тухашардаг. 2021-2022 онуудта үбшэнһөө боложо, найр наадан хүдөө нютагуудаарнай булта болюулагдаһан байгаа. Гэбэшье энэ жэлэй Сагаалганай һайндэр онлайн аргаар үргэнөөр тэмдэглэгдэбэ. Бар жэлтэн гэхэ гү, али нютагайнгаа һургуулида хамта һуража дүүргэһэн нэгэ ангиин түлөөлэгшэд видео-амаршалгаар баяраа хүргөө. 1962, 1974, 1986, 1998 онуудта түрэһэн хүнүүд жэлээ оруулһан тула, видеоролигуудые бэлдэбэ, нютагаархидаа хани халуунаар амаршалха, дуугаа бэлэглэхэ аза тэдээндэ тудаба. Агада Сагаалгандаа эртээнһээ бэлдэнэ. Юундэб гэхэдэ, нютаг зоноо Сагаалганаар амаршалха гээшэ ехэ харюусалгатай хэрэг ха юм. Хаа- хаанагүй - холын хотонуудаар, хари гүрэнүүдээр таража ажаһууһан нютаг зон Интернедэй туһаар энэ видео-бэшэлгэдэ хамтарха боломжотой болоно. Видеоролигууд элдэб аргаар бүтээгдэнэ. Нэгэ зарим жэлтэн мэндэшэлгэһээ гадна элдэб зүжэг, бүжэг табина. Нютагайнгаа үзэсхэлэн газарнуудые харуулна. Тиигэжэ видео-бэшэлгэнүүдээ гоё болгоно. Видео-бэшэлгын үшөө нэгэ һайн талань гэхэдэ, хүн хаанашье байгаад, нютагайнгаа һайхан шарай хараха аргатай. Иимэ буулгабаринууд хүнэй досоо һайхан мэдэрэл түрүүлнэ. Сагаалганай олохон видеоролигуудые һонирхожо үзэбэб. Хамта дээрээ 25 видео оложо харабаб. Догойн, Сагаан Уулын, Ага-Хангилай, Гүнэйн, Шандалиин, Зүдхэлиин, Хойто-Агын бар жэлтэнэй бэлдэһэн ролигууд минии һанаанда ехэ һайшаагдаба. Ютуб[1]субагта байһан сагаан-уулынхидай видео-амаршалгые 10 мянган хүн нээжэ хараһан байха юм. Бэшэ видео-буулгабаринууд 3 мянгаһаа 5 мянган хүрэтэр хүн хараһан байна. Саашаа үшөөшье олон хүн хараха бэзэ. Хэрбэеэ Сагаалганай видеоролигуудые хараха гэбэл, Ютуб-субагта орожо, али нэгэ нютагай нэрэ бэшэхэдэ, гараад ерэнэ. Манай Сагаалган бултанай эб нэгэдэлэй һайхан баяр, арадайнгаа түүхэ, ёһо заншал, эхэ хэлээ хүндэлхэ һайндэр мүн.