Уушханай ханяадан улам һүжэрһөөр

- Валерий Вениаминович, пандемиин үедэ ажалаа яагаад ябуулнабта?

 - Пандемиин үедэ үнэхөө-рөөшье ажалаа бага зэргэ хубилгаха болообди. Уушханай ханяадатай зондо ехэ аймшагтай саг тохёолдоо. Ковид гээшэмнай уушха эдидэг үбшэн гэжэ дуулаһаар лэ, яагаад уушханай үбшэнһөө зоноо абархаб, аргыень хайшан гэжэ хэхэб гэһэн асуудалнуудые Элүүрые хамгаалгын яамантай, эмшэдээрээ зүбшэн хэлсээбди. Уушханай үбшэнтэй хүн ковидаар үбдөөд, больницада юрын зонтой нэгэ байрада арга абажа шадахагүй гээшэ ха юм даа. Уласайнгаа Элүүрые хамгаалгын яамантай суг ажаллаһан үрэ дүн харагдана гээшэ ааб даа. Тиимэ һэн тула өөрынгөө диспансертэ ковидаар үбдэһэн зоноо аргалха амяарлаһан унтаринуудые бэлдээ һэмди. Мүнөө сагта 30 унтари түхеэрэгдэнхэй. Тэрэнэй хажуугаар гэртээ байгаад, арга абадаг зондо эмүүдые абаашажа үгэдэг болообди. Тусхай фасовочно машинкаар хубаажа, эмшэдһээ бүридэһэн бүлэгүүдтэ, гэртээ арга абажа байһан уладта абаашагдана. Тусхай видео-холбоо барижа, эмүүдээ барихыень шалгадагбди. Манда компьютерна томограф ажалладаг. Тиигэжэ энэ муухай үбшэнэй дэлгэрһэн сагта бусад эмнэлгын газарнуудта байдал бүришье доройтуулхагүйн түлөө оролдонобди.

- Эмшэдээр хэр хангагданхайбта?

- Энэ бэрхэшээл манай эмнэлгын газарта баһа бии юм. Дээдэ гарай эмшэдээр 70 хуби хангагданхайбди. Дунда гарай мэргэжэлтэдээр баһа тэды шэнээн. Энэ жэлдэ манда гурбан залуу эмшэд ерээ гэжэ ехэ жаргалтайбди. Шэтын, Эрхүүгэй эмнэлгын дээдэ һургуулинуудтай нягта холбоотойгоор ажалланабди, хэлсээнүүдые баталанхайбди. Манай ажалда эмшэдэй дунда онсо мэргэжэл байдаг ха юм даа. Фтизиаторнууд хадаа үшөө пульмонолог, рентген уншадаг эмшэнэй мэргэжэл мэдэхэ ёһотой болоно. Тиигэжэ фтизиаторнууд ехэ үргэн мэдэсэтэй байбалнь, тон һайн. Загарайн болон Хяагтын аймагуудта манай филиалнуудта эмшэд дуталдана.

 - Уушханай үбшэ аргалдаг газарнууд үшөө ямар аймагуудаар бииб?

 - Хяагта хотодо болон Селенгинск тосхондо стационарнууд 60-60 һууритай. Хүүгэдэй санаторинууд Улаан-Үдэдэ “Солнышко” санатори, Түнхэнэй аймагай Аршаан нютагта, Кабанскын аймагай Ильинкэ нютагта оршоно. Диспансернүүд Загарайда болон Гусиноозерск хотодо бии.

 - Буряад Уласта уушханай үбшэнтэй зоной тоо ургана гээшэ гү?

- Һүүлэй сагта үбдэһэн зоной тоо урганагүй, харин доошолжо эхилээ. Тэрэнь һайн гээшэ. Тиибэшье бидэ ажалаа аалидуулнагүйбди. 2020 ондо Буряадай Элүүрые хамгаалгын яаман рентген хэдэг тусхай 13 автоунаа абаһан байна. Тэрэнэй ашаар лэ аймагуудаар ябажа, хүн зоной уушха шалгаха ажал дээшэлээ. Тэрэмнай эгээн түрүүшын шата болоно. Саг соонь элирүүлээ һаа, саашадаа арга хэхэнь бэлэн байха. Ковидай тараһан сагта байдалнай ямар тээшээ хубилхаб гэжэ урид мэдэхын аргагүй бшуу даа. Элүүрые хамгаалгын Бүхэдэлхэйн эмхиин хэлэһээр, наһа бараха ушарнууд олошороо. Тиингүй яахаб даа. Харин Буряадта ковидаар халдаһан үбшэнтэнэй нэгэнииньшье наһа бараагүй. Манай гол зорилго – 2 жэлэй хугасаа соо уушхаяа шалгуулаагүй зониие шалгаха. Нүүдэл рентген унаануудаар холын аймагуудаар, нютагуудаар ябажа, флюроографи хэхэнь шухала. Багшанар, эмшэд, ямаршье ажалтай зон шалгалта хүүлэнэ гээшэ. Ажалгүй зониие оруулха түсэбтэйбди. Тэрэнэй хажуугаар һэргылэмжын ажал ехэ һуури эзэлдэг. Олондо мэдээсэл тараадаг эмхинүүдтэ, интернедэй социальна хуудаһануудта туберкулезһоо яагаад бэеэ аршалха, хамгаалха тухай хөөрэжэ, хэлэжэ байдагбди. Энэмнай манай ажалай таһаршагүй хуби болоно.

 - Валерий Вениаминович, асуудалнуудтамни харюусаһандатнай баярые хүргэнэб.