Үбэлэй Байгал үлүү һайхан

– “Ураалай авиалининүүд” гэһэн компаниин онгосоор 150 хүн буужа ерээ. Энэ аяншалгын хүтэлбэриие “TUI Россия” гэһэн федеральна туроператор  бэелүүлнэ.  Аяншалгын талаар федеральна агентство болон Буряад Уласай Засагай газар энэ түсэлдэ дэмжэлгэ үзүүлнэ”, – гэжэ аяншалгын сайд Алдар Доржиев хэлэнэ.

Сайдай хэлэһэнэй ёһоор, холо ойроһоо бууһан айлшад манай Буряад ороной хүхэ номин тэнгэриие, нарата сэлмэг һаруул үдэрнүүдые, Байгал далайн тунгалаг мүльһые үнэн дээрээ хаража үзэхэ болоно. Буряад Уласта тусхай зорилгото тур абажа ерэһэн хүнүүд Байгал далайе харахаһаа  гадна, уласта ажаһуудаг үндэһэн арадуудай, тэрэ тоодо шэмээшэгүүдэй соёл, ёһо заншалтай танилсаха, амтан эдеэ унданһаа ама хүрэхэ юм. Гадна Ород гүрэнэй буддын шажанай түб болохо Ивалгын дасан ошохо, Этигэлтэ хамба ламые золгохо. 

–Буряад орон,  Байгал далай ондоо тээхи зоной һонирхол яһала татана. Гүрэнэй талаһаа дэмжэлтын  ашаар Ураалһаа Калининград хүрэтэр бүхы нютаг можонуудһаа аяншад хямдахан сэнгээр Байгал далай хүрэхэ арга боломжотой болоо бшуу. Найман үдэрөөр иишэ ерэхэдээ, хоёр хүнэй стандартна тур 75 612 түхэригтэ, харин ганса нэгээрээ тур абаһан хүнэйхи 35 706 түхэригтэ хүрэнэ. Энэ чартерна рейсээр хэгдэжэ байһан тур байгша оной мартын эсэс болотор үргэлжэлхэ. Буряад Улас руу агаарай онгосо долоон хоногто нэгэ удаа ерэжэ байха, – гэжэ “TUI Россия” гэһэн компаниин захиралай орлогшо Александр Сирченко хэлэнэ.

2020 ондо Буряад Улас туршалгын нютаг можонуудай тоодо орожо, Байгал тээшэ чартер ниидэжэ эхилээ һэн. Тус тур эрилтэ ехэтэй, үнгэрһэн жэлэй зунай ба үбэлэй хаһада хамта дээрээ 5 мянган аяншад Буряад Уласта айлшалһан байха юм. Буряад Уласай Толгойлогшо Алексей Цыденовэй мэдээсэһэнэй ёһоор, айлшадай буудалнуудта байха байрын  хүртэхэгүй болоһон дээрэһээ бидэ аяншадые хизаарлаха баатай болонобди. Ерэхэ дуратайшуул үнэн дээрээ үшөө олон гэжэ ойлгохо хэрэгтэй. Уласта хүрэнгэ оруулагшад ерэнхэй, тэдэнэр “Байгалай гавань” гэһэн эдэй засагай тусхай бүһэлүүртэ отельнүүдые бариха юм.    

Буряад орон, Байгал далай аяншалагшадай дуратайгаар ерэдэг газарнуудай нэгэн болонхой. Хэдыхэн жэлэй урда баруун тээһээ Байгал хүрэжэ ерэхэнь  бэрхэтэй байгаа. Харин мүнөө энээхэн чартерай ашаар аяншад үбэл зунгүй манай  нютаг хүрэжэ ерэхэ, Буряад Уласай гайхамшаг соёлтой танилсаха, Байгалай үзэсхэлэн һайхан байгаали хараха аргатай болоо. Гадна уридшалан тур захиха гэжэ оролдоһонойшье хэрэггүй. Мүнөө чартерна программын тур багсаарнь худалдажа абахадаа, хоёр тээшээ ниидэлгэ, зошод буудалда байлга, экскурсинууд – эдэ бүгэдэ нэгэмүһэн оруулагдана. Аяншадай ерэхэлээрнь, “хүлыень газарта хүргэнгүй” гэхэ гү, али онгосоһоо хүндэтэйгөөр угтажа абаад лэ, ябаха, үзэхэ газарнуудыень хуу харуулаад, эдеэлүүлээд, ундалуулаад, амаруулаад, һөөргэнь гэртэнь эльгээнэ гээшэ. 

2022 оной үбэлэй хаһада Буряад Уласай айлшадые агаарай подушка дээрэ ябадаг уһан онгосоор Байгал дээгүүр сэнгүүлхэ юм. Тиихэдэ  вертолётно экскурси, мүльһэн дээрэ гольф наадан, Сагаалганда зорюулагдаһан хэмжээ ябуулга, “Байгалай миля” гэһэн мүльһэн дээрэ автомашинануудай урилдаан гэхэ мэтэ һонирхолтой үйлэнүүд аяншалагшадые хүлеэнэ.      
Москваһаа Улаан-Үдэ руу үбэлэй чартерна рейснүүд февралиин 26-да, мартын 5-да, мартын 12-то, мартын 19-дэ хэгдэхэ юм. Һануулхада, февралиин 12-то, февралиин 19-дэ аяншалагшад Буряад ороной һонирхолтой газарнуудаар айлшалаа.

Зунай сагта иимэ чартернууд үшөө үргэлжэлхэ, аяншалгын шэнэ түлэбүүд бэелүүлэгдэхэ.