Аяншалга хүгжөөхэ зорилготойгоор

Буряад Уласай Аяншалгын яаман аяншалга хүгжөөхэ талаар түсэлнүүдые февралиин дууһатар хүлеэн абажа байнхай. Аяншалгын компанинууд бэлдэһэн түсэлнүүдээ тушааха гэжэ мүнөө тон сүлөө забгүй тухашаржа байна гээшэ. Энэ жэлдэ орожо байһан түсэлнүүд соо ехэнхинь  хүдөөгэй аяншалга хүгжөөхэ зорилготой гэжэ Аяншалгын яаманай мэргэжэлтэд онсолон тэмдэглэнэ. Тиихэдэ экологиин болон ниигэмдэ туһатай түсэлнүүд баһал олон ха.

Нёдондо 12 илагшадта грантова дэмжэлтэ үзүүлэгдэһэн байгаа гэжэ һануулая. Илагшадай 4 түсэлынь  хүдөөгэй аяншалгын талаар байгаа, 2 түсэл – экологииин аяншалгаар. 1 түсэл удхаараа ниигэмдэ туһатай байгаа. Тиихэдэ аяншалга  улам саашань хүгжөөхэ  талаар 5 түсэл шэлэгдэһэн юм.

Шалгарһан 12 түсэлые бэелүүлгэдэ хамта дээрээ 4,1 сая түхэриг һомологдоо һэн. Тиин Түнхэнэй аймагта буга баридаг фермэдэ найман ханатай балгааһан гэр баригдаа. Амаржа ябаһан хүнүүд тэрэ гэртэ хонон байха аргатай болоо. Хяагтын аймагта Шитиловка гэжэ газарта хасагай зуһалан гэр, зүгын балай гэр-музей баригдаа, Хориин аймагай Бульдюруй гэжэ газарта 5 ханатай һэеы гэрнүүд баригдаа. Тиихэдэ Байгалай биосфернэ заповеднигтэ хүүгэдэй, залуушуулай, наһатай зоной хүнгэлэлтэтэй экскурсинууд эмхидхэгдэһэн  байгаа.

Экологиин аяншалгаар Түгнын талада оршодог Мэргэдүүдэй хэрэм руу ошохо ябаган харгы гаргагдаа. Улаан-Үдэдэ “Хото” гэһэн экскурсиин фестиваль үнгэрөө һэн. Асагад нютагай “Талын нүүдэлшэн” гэһэн амаралтын газарта анимационно программанууд оруулагдаа, шэмээшэгүүдэй үндэһэн хубсаһан оёгдоо. Аршаанууд тухай табан видео-фильм буулгагдаа юм.