Бэлигтэй багшын зам

Хун шубуун гарбалтай,  хуhан модон сэргэтэй, хори буряадай отогтой, баатар хүбүүдэй заншалтай батанай yгай омогой Аюрай Бальжинимын Эльвира Яруунын аймагай Нарһата һайхан нютагта түрэһэн юм.  Баян хаан баабайтай, Ярууна хатан эжытэй, Дархита баабай мүргэлтэй,  замби түбиин хүйhэн гэгдэhэн Зандан Жуу дасантай, Алтан үндэр уула түшэлгэтэй, Гулбай ехэ нуурнуудтай, Молон багшын заабаринуудтай,  гушан гурбан баатарай тоонто болохо  Ярууна бэрхэ хүбүүд басагадаараа суутай юм.

Эльвира Бальжинимаевнагай абань Түдэбэй Аюрай Бальжинима бүхы наhаараа  партийна ажалда хүдэлhэн намтартай. Яруунын аймагай урдаа хараха хүбүүдэй нэгэн Түдэбэй Аюрай Бальжинима Захааминай, Хориин, Яруунын  аймагуудаар гүйсэдхэхы хорооной түрүүлэгшээр, партиин  нэгэдэхи секретаряар хүдэлhэн байна. CCCР-эй Дээдэ Зүблэлэй долоодохи зарлалай һунгамалаар һунгагдажа, нютаг нугынгаа хүгжэлтэдэ туйлай ехэ хубитаяа оруулһан гээшэ. Хүндэтэ амаралтада гаратараа, Буряад Уласай намай хороондо ажаллаа һэн. Аргагүй эдэбхитэй, урагшаа һанаатай, ажалдаа хананхатай хүн байгаа.  

Эльвира Бальжинимаевна Хориин нэгэдэхи дунда hургуули дүүргэжэ, Доржи Банзаровай нэрэмжэтэ багшанарай институдта ороhон байна. 1971ондо биологи-химиин таһаг  дүүргэжэ, Зүүн Сибириин гүрэнэй соёлой дээдэ һургуулиин  комсомолой хорооной  даргаар ажалайнгаа намтар эхилhэн юм.

1973 онhоо Буряадай гүрэнэй багшанарай дээдэ һургуулида  хүдэлжэ захалаа. Харин 1980 ондо Ленинградай А.И.Герценэй нэрэмжэтэ инститyдай аспирантyра дүүргээд, нютагаа бусажа ерээ һэн.

Тиин залуу мэргэжэлтэн багшанарай дээдэ һургуулиин  анатомиин болон физиологиин кафедрада ажалаа үргэлжэлүүлээ. Удааншье болонгүй, биологи ба хими үзэдэг  факультедэй хүмүүжүүлгын хүдэлмэриин талаар деканай орлогшоор томилогдоо бэлэй.  Удаань психологиин кафедрын ассистентээр, нэмэлтэ мэргэжэлнүүдэй таһагай деканай орлогшоор хүдэлхэ  уялга даажа абаһан байха юм. Бэлигтэй багша-эмхидхэгшэ, үүсхэл ехэтэй Э.Б. Аюровагай хүтэлбэри доро оюутад нэгэдэжэ, конкурснуудые, КВН-наадануудые  эмхидхэдэг һэн. Гэхэтэй хамта хэды олон һонирхолтой үдэшэнүүдые  тэдэ үнгэргөө гээшэб! Залуушуулай бэе тамирта, сүлөө сагта гол анхарал хандуулагдадаг байгаа. Тиимэһээ “Оюутан ба элүүр энхэ байдал” гэhэн шэглэлээр хүдэлдэг клуб ажалаа таһалдуулаагүй. Харин инститyдай «Байгалай долгинууд» гэhэн оюутадай ансамбль Монголой Улаан-Баатар хотодо үнгэргэгдэһэн бүхэдэлхэйн залуушуулай форумдо хабаадаха аза талаантай байгаа.

         Оролдосо ехэтэй багшын аша туhаар амаралтада гараhан ажалай ветерануудташье  анхарал хандуулагдадаг һэн. Эльвира Бальжинимаевнагай ударидалга доро удха шанартай уулзалгануудмэнэ-мэнэ үнгэргэгдэдэг байгаа. Мүн институдай  кафедрануудта, cоциальна ажалай болон психологиин таhагта элидхэлнүүдые бэлдэжэ уншаһаниинь тоогүй юм ааб даа.

Багшын ажал  харюусалгатай. Эльвира Бальжинимаевна ажалаа тон һайнаар, хананхатайгаар  ябуулдаг байгаа. Оюутадаа ажабайдалһаа  үндэhэлэн һургадаг, үзэжэ байһан материалнуудые ойлгуулжа үгэхэ элдэб онол аргануудые  хэрэглэдэг һэн. Гэхэтэй хамта өөрынгөө эрдэм мэдэсэ жэншэдгүй дээшэлүүлдэг  бэлэй.

• Гадаада оронуудай, гүрэн түрынгөө эрхим шэнжэлэгшэдэй номуудые хэрэглэхэеэ эрмэлзэдэг, hонин удхатай наадануудые, түхэреэн шэрээнүүдые, семинарнуудые абьяастайгаар эмхидхэдэг багша, - гэжэ БГУ-гай профессор, эрдэмэй доктор Т.Л.Миронова тэмдэглэhэн юм.

Э.Б.Аюрова бэеын тамирай факультедэй декан В.М. Цинкерэй урилгаар  найман жэлэй туршада 1-4-дэхи курснуудай  оюутадта психологи зааһан байна.  Дээдэ мэргэжэл абажа гараһан оюутадынь мүнөө болотор багшаяа мартаагүй, хүндын тэмдэг үзүүлһээр. Һайндэрнүүдые алгадангүй хани халуунаар амаршалжа, һонин һорьмойгоо дуулгажал байдаг.  Харин сугтаа хүдэлhэн багшанар - Калмыков С.В., Бардонова Л.К., Цинкер В.М., Зыкова О.М., Доржиев Ц.З., Ловцова Н.М.,  Гончиков Ц.Д.,  Елаев Э.Н., Миронова Т.Л.,  Санжаева Р.Д.,  Тудупова Т.С. гэгшэд  Эльвира Бальжинимаевнагай зүрхэ сэдьхэлдэ онсо һуури эзэлдэг.

- Суг хамта хүдэлһэн, мүнөөшье ажалаа үргэлжэлүүлэн, оюутадаа һургаха хэрэгтэ шармайн ябаһан багшанараа  доро дохин, халуун зүрхэнэй оёорhоо  амаршалаад, Сагаан һарын мэндэ хүргэнэб.   Буряадай гүрэнэй багшанарай  институдай  байгуулагдаһаар 90 жэлэй ойн баяраар амаршалгыемни мүн  тогтоогыт. Таанадтаа бүхы дэлхэйн hайн hайханиие хүсэнэб, - гэжэ  Эльвира Аюрова дамжуулба.

Эльвира Бальжинимаевна Аюрова олон жэлэй туршада таһалгаряагүй амжалта түгэс ажаллаһанай  түлөө “Оросой Холбоото Уласай  дээдэ мэргэжэлтэ болбосоролой хүндэтэ хүдэлмэрилэгшэ” гэһэн үндэр нэрэ зэргэдэ хүртэһэн.   Эльвира Аюрова ганса багшын ажал  хэжэ ябаагүй, олониитын хэрэгтэ  хамсыгаа шаман  хабаадалсадаг заншалтай. Тэрэ  арадай «Тоонто» ансамблиин эдэбхитэй гэшүүн. Улаан-Үдэ хотын соёлой таhагай зүгhөө барюулагдаһан Баярай бэшэгүүд, хүндэлэлэй грамотанууд – Эльвира Бальжинимаевнагай дундаршагүй талаан бэлигэй гэршэ.

 Тоонтоёо  суурхуулжа ябаһан эрдэмтэн, бэлигтэй хүмүүжүүлэгшэ Эльвира   Аюрова багшаяа һанан дурдан байдаг һурагшадынь, нютагаархидынь  Буряадай гүрэнэй багшанарай институдай  90 жэлэй ойн баяраар амаршалан, үлзы хэшэгтэй,  hайн hайхан ажаhуухыень хүсэнэ.    

            Эрхим хүндэтэ  Эльвира Бальжинимаевна!

Бүхы аха дүүнэрэй, түрэлхидэй, заалгаhан оюутадай зүгhөө институдай  90 жэлэй ойн баяраар  хани халуунаар амаршалнабди.

Улаан нараяа үглөө бүри угтажа, зугаа наадаяа эмхидхэжэ, ашанараа  хэшээлһээнь угтажа, сагаан hайхан сэдьхэлтэй, дундаршагүй дүүрэн жаргалтай, энхэ элүүр хододоо ябахатнай болтогой!

Уг гарбалаа хүндэлжэ, үри  хүүгэдэйнгээ дулаахан дүхэригтэ үшөө олон жэлдэ урин зулгы зандаа, урма баяртай  ябахатнай болтогой!

 

ВАРК-ын Вице - Президентээр 2006-2010 онуудта хүдэлhэн Мунко-Жаргал Аюшеевич Дармаевай хөөрөөгөөр Янжима Дармаева бэлдэбэ.