694
Би 1961 ондо энэ институдта орожо, 1965 ондо дүүргэһэмби. Энэ ансамбль 1961 ондо Улаан-Үдэ хотын оюутадай ансамбль байһан юм даа. Би эндэ эхинһээнь хатарһан, дуулаһан гээшэб. Багшын институдһаа Дуся Хамаганова, Содном Дамбаев, Катя Раднаева болон бэшэшье оюутад үбэлдөө зуурахаяа һанатараа, Виадук дээгүүр гүйлдэжэ, Железнодорожно Соёлой байшан руу репетицидээ ошодог һэмди. Хүдөө ажахын институдһаа Саша Хамаганов, Чимит Дымчиков болон олон оюутад ябадаг байгаал даа. Иллюзионист Владимир Цыренжапов ябадаг бэлэй (хаана һурадагыень мартааб), аман сооһоо бритвэнүүдые гаргажа, маанадые гайхуулдаг һэн. Соёлой дээдэ һургуулиһаа Эля Дымбрылова, Цындыма Цырендашиева болон олон оюутад ансамбльда дууладаг, хатардаг һэн ааб даа. Энээн тухай Элиһээ һурабаб: “Таанад “Байгалай долгиндо” ябадаг байгаат. Зүб һанана гээшэ гүб?”- гэбэб.
-Тиимэ даа, бидэ Цындымэтэеэ ябадаг һэмди, 1961 ондо үшөө манай институдһаа Саша хүгжэмшэн ябадаг һэн,- гэжэ харюусаба.
Маанадта Оперно театрһаа балетмейстер Фёдор Сергеевич Иванов хатар заадаг байгаа, одоол шанга журам сахидаг һэн даа. Нэгэшье үлэжэ болохогүй, заал һаа гаргажархидаг һэн. Хормейстерээр Анастасия Андреевна Халанова хүдэлдэг байгаа. Түмэр харгын эмхиин зүгһөө Иланск руу 2 басагад, 2 хүбүүд, 1 хүгжэмшэн ошожо, ехэл амжалтатай ябажа ерээ һэмди. Дусимнай энэдхэг хатар аргагүй гоёор хатардаг һэн.
Түүхэ үнэн байг лэ даа гэжэ һанаһандаа, дурсан бэшэбэб. Бидэ, тэрэ үеын зон, наяһаа дээшэ наһатайнууд болоод ябанабди. Һүүлдэнь багшанарай институт энэ ансамбль халан абаһан болоно ха даа. “Байгалай долгинууд” ансамблиин байгуулагдахада, эхиндэнь хатарһан, дуулаһан зон мэндэл ябана ёһотой даа, дурсалгануудаараа хубаалдаха бэзэ гэжэ найдаһандаа бэшэбэб даа.
Фото: Гэр бүлын архивһаа
