Ажалтай болгохо хүсэлтэй

- Андрей Дондокович, Һутайн һургуули түгэсхэһэн сагһаа нютагтаа ажаһуугаагүйт. Хаана юу хээ гээшэбта?

- Үнэр баян айлай үриб. Һургуулияа түгэсхэһэнэй удаа сэрэгэй алба гаража ерээд, БГУ-гай түүхын факультедтэ орооб. Тэрэшэлэн Улаан-Үдын “Центурион-2” компанида харуулшанаар орооб. Удаань «Бурятзолотодо» Ахын болон Хойто Байгалай аймагуудта хүдэлөөб. Эбэртэ бодо мал үсхэбэрилгөөр, барилгаар олзын хэрэгшье байгуулаад туршааб. Сахалин болон Камчатка вахтаар ябажа ажаллаашьеб.

- Теэд юундэ нютагаа бусаха гэжэ шиидээбта?

 - Түрэһэн нютагтам сомон дарга тушаалаа сагһаа урид орхибо гэжэ дуулааб. Тиимэһээ урилдаан соносхогдоһон байгаа. Бүхы хэрэгтэй дансануудые бэлдээд, хабаадаха болооб. Конкурсын бүхы шатануудые дабажа, сомон даргаар томилогдоһон байнаб.

 - Ямар түсэбүүдые хараална гээшэбта?

 - Хүдөөдэ аяншалга хүгжөөхэ һанаан байна. Бүри 1998 ондо “Чингис хаанай зүргэ” гэжэ аяншалгын маршрут зохёогдоһон юм. Энэ зүргэ һэргээхэ хүсэлтэйб. Манай нютагта нилээн олон айл бүлэнүүд ажаһуудаг. Бүһэтэйшүүлынь вахтаар ябажа, ажал хэнэ. Тиигэхэгүйнь тулада тэдэндэ нютагтаа ажал зохёохо тухай бодоноб. Нарһатын сомоной бүридэлдэ хоёр һуурин ороно. Эдэ һууринуудай ажаһуугшад гол түлэб үмсэдөө мал барижа, хоолойгоо тэжээнэ гээшэ. Бүхы үрхэтэ айлнууд малаа баряад байбалнь, ажабайдалнай бүри һайн болохо һэн. Тиигэхын тулада оролдохоб.