Эхэнэрнүүднай загаһа барижа мүрысэхэнь

Тус мүрысөөн эхэнэрнүүдэй уласхоорондын һайндэртэ зорюулагдана.

-Мүльһэн дороһоо загаһа хахуулидажа бариха урилдаанда хабаадаха дуратайшуул, «Снасти страсти» болон  «Рыбачьте с нами» гэһэн худалдаанай дэлгүүрнүүдтэ ошожо,  мэдүүлгэ барихада болоно, - гэжэ Буряадай загаһа барилгын федераци дуулгаба.

Буряадтамнай үнгэргэгдэдэг «Байкальская рыбалка» гэһэн урилдаан холо ойгуур мэдээжэ болонхой. Ород Уласай хэдэн олон можо нютагуудай түлөөлэгшэд аза талаан  туршахаяа Байгал далай ерэдэг гээшэ. Тэндэ эхэнэрнүүдшье хабаадалсадаг юм. Харин мүнөө гансал эхэнэрнүүдэй дунда загаһа барилгаар урилдаа үнгэргэһэниинь гайхалтай. Хайрата һанагдаха эжынэр, хани нүхэднай хабарай түрүүшын һайндэр тэмдэглэнгээ, сэбэр агаарта загаһа барижа сэнгэг лэ! Бариһан загаһаараа гэртэхиндээ амтатай эдеэ шанажа үгэхэ бэзэ.