Хүндэмүүшэ Буряад орон

Украинада тусхай сэрэгэй операци эмхидхэгдэжэ байгаа сагта Донецкэ болон Луганска Уласуудһаа арад зон Россиин тала дайда руу ороно. Тиин тэдэниие бултыень байрлуулха, хубсалуулха, хооллуулха хэрэг гараа. Хилын хажуугаар байһан хото нютагуудаар тиимэ зоной олон болоо һаань, Россиин бусад можо хизаарнуудаар тарааха гэжэ хэлэгдээ. Уласһаа гаран ошоһон зоной түрэлхид олоороо хаана һуунаб, тэрэ можо хизаарнуудаар эльгээгдэхэ гээд, данса соо бэшээтэй. Буряад Улас 1402, Эрхүү можо – 460, Үбэр Байгалай хизаар 940 хүниие байрлуулха болобо. Харин Росси дотор бүхыдөө 96 мянган зон орожо ерээ. Тиимэ хубаари Россиин Онсо байдалай яаман хэһэн байба. Угтан абажа шадаха можо хизаарнуудые 2014 оной байдалаар элирүүлээ. Буряад Уласай Засагай газарай мэдээсэлэй албанай мэдүүлһээр, хэзээ, хаана тэдэ зониие байрлуулха тухай мүнөө хөөрэлдэжэ байна.

 Һануулан хэлэбэл, Буряадай Толгойлогшо Алексей Цыденов хохидоһон зониие угтан абахаар бэлэмди гэжэ дуулгаһан байгаа. 2014- 2015 онуудта Украинаһаа гаража ерэһэн зониие нютагтаа угтаа һэмди. Хэрэгтэй туһа үзүүлжэ, мүнгэ алтанай талаар хамһалсаа, үхибүүдыень сэсэрлиг болон һургуулинуудта оруулаа бэлэй. Олонхинь хүдөө нютагуудаар, ажахынуудаар тараагдаһан байгаа гэжэ һануулая.