Нютагаа шэмэглэн хүдэлнэ

- Үсөөн ажаһуугшадтай аймагаймнай аяар 25 ТОС мүнгэн шангуудта хүртэһэндэнь ехэ баяртайбди. Бүхыдөө 1 сая 585 түхэриг тэдэмнай шүүжэ шадаа. “Өөрлиг” гэһэн ТОС түрүүлжэ, 200 мянган түхэриг абаа, - гэжэ Ахын аймагай социальна хорооной мэргэжэлтэн Сэсэг Лопсон-Доржиевна Гончикова хөөрэнэ.

 Уласай хэмжээндэ шалгарһан “Өөрлиг” ТОС-ой хүтэлбэрилэгшөөр Валерий Валерьевич Торпинкеев хүдэлнэ. Һүүлэй байдалаар 130 гэшүүд эндэ тоологдоно.

 - Самбяловай нэрэмжэтэ үйлсэдэ ажаһуугшад энэ ТОС нээһэн байгаабди. Зайн галай баханануудта лаампануудые үлгэжэ, үйлсэеэ гэрэлтүүлээбди. Тэрээнһээ хойшо хүн зомнай ТОС-ой ажалда эдэбхитэйгээр оролсожо эхилээ, - гэжэ Валерий Торпинкеев хөөрэнэ.

 “Өөрлиг” ТОС ажалаа гансашье аймагай түбтэ ябуулна бэшэ, бүхы аймагайнгаа газар дэбисхэр дээрэхи оршон байдал, шэг шарай һайжаруулха гэжэ оролдоно. Тиигэжэ ТОС-ой эдэбхитэд Дэбиин аршаан ошожо сэбэрлээ. Хүүргэ һууринда барилдаанай найман ханатай гэр барилгада туһалалсаа. Хэдэн жэлэй саана «Тохойн модохонууд» гэһэн ажахыһаа үрэһэ асаржа, Өөрлиг һууринай дэбисхэртэ модонуудые һуулгаа. Шэрүүн уларилтай Ахын байгаалида тэдэнь яһала тааража, олоной шэмэг болонхой. Һаяхана баригдаһан амаралтын талмайе ахынхид мэргэнээр “Арбат” гэжэ нэрлэнхэй. Тэндэ модохонууд асарагдажа, байгша 2022 ондо һуулгагдахаар хараалагдана.

 - Өөрлиг һууринда оршодог бүхы ТОС-ууд хамтаржа, ажалаа ябуулдаг заншалтайбди. Һүүлэй хоёр жэлдэ нютагай түбэй стелэ бүтээгээбди. Мүн Гэсэр баатарай морин дээрэ һууһан хүшөө энэ талмайе гоёоно. Эндэ ажалнай үшөө дүүрээдүй. 2022 ондо талмайень бетоноор хушахабди, стелэмнай бүри гоёор шэрдэгдэхэ. Тэндээ мэдээсэлэй хана табихабди. Аймагай захиргаанай, илангаяа Матвей Валентинович Мадасов засаг даргын туһаламжаар Эсэгэ ороноо хамгаалгын дайнда зорюулагдаһан паркда хоёр жэлэй хугасаада заһабарилга хэгдэһэн байна. Сэрэгшэдэй хүшөө хуушараа, һэргээн шэнэлэлгын ажал ябуулагдаа. Хажуудань үшөө хоёр хүшөө табяабди. Дайнай үхибүүдтэ болон ара талада хүдэлһэн ажаһуугшадта тэдэмнай зорюулагдана, - гэжэ Валерий Торпинкеев хэжэ байһан ажалнуудтаяа танилсуулна.

 Өөрлиг дээрэ эрхимээр хүдэлжэ байдаг ТОС-уудай дунда “Наран” гээшые тэмдэглэмээр. 2020 оной дүнгөөр уласай конкурсдо “Наран” 80 мянган түхэригөөр шагнагдаа. Намсарай Иннокентьевич Ошоров Машаевай нэрэмжэтэ үйлсын ажаһуугшадые суглуулжа, энэ нэгэдэл байгуулаа бэлэй.

 - Манай Өөрлигтэ шэнэ үйлсэ нээгдэхэдэнь, тэндэхи ажаһуугшадтай 2019 ондо уулзаабди. Тэдэ ТОС-ой ябадалые һайн мэдэхэ байшоо. Булта дуратайгаар зүбшөөлөө үгөө. Нэн түрүүн үйлсэеэ гэрэлтүүлээбди. Жэлэй дүрбэн сагта булта сугларжа, газар дэбисхэрээ бог шоройһоо сэбэрлэнэбди. Манай гэшүүд ой модон соо түймэрэй соробхилходо, ошожо унтараалсадаг, - гэжэ Намсарай Ошоров мэдүүлнэ.

ТОС-ой ашаар Өөрлигэй зүүн хада дээрэ харалгын талмай бүтээгдөө. Тэрэнь олоной дуратай үзэсхэлэнтэ газар болонхой. Ахын аймагай бусад ТОС-уудай ажал тухай хирэ болоод лэ хөөрэхэ түсэбтэйбди.