729
- Сайн байна, Надежда! Сүлжээ холбоондо хүн яажа хубсаһа тааруулан үмдэхэб гэһэн хөөрөөнүүдые бэлдэнэт. Тэрэ мэргэжэлдэ хаана һураа гээшэбта?
- Нёдондо нажарһаа эхилжэ, Инстаграмда юу хээ толилжо эхилээб. Тэрээнһээ урид минии хуудаһан хаалтатай, гансал нүхэдэй үзэмжэдэ байдаг һэн. «Инстаграмда үнгэ зүһэ болон элдэб янза тааруулжа, хубсаһа шэлэхэ тухай һонирхолтой зураглалнуудые бэлдэжэ туршахаяа һананаб, - гэжэ нүхэртэеэ хубаалдахадамни: - Дуратайгаа, һанаһанаа хэжэ турша, гайхажа байха юумэн үгы», - гэбэ хани нүхэрни. Тиихэдэнь тэрэ дороо сүлжээ холбоонойнгоо нюур-хуудаһа ямаршье хүнэй хараха аргатай болгооб. Түрүүшээр буулгаһан, хөөрэһэн видео дэлгэхэеэ эшээб. Багахан зураглал хэды сагай туршада буулгааб (энеэнэ). Өөрыгөө аргадахаһаа наагуур боложо байжа, тэрэнээ толилооб. Тиигэһээр байтараа, нэгэ бага дадагдаа юм ааб даа. Хубсаһа тааруулан үмдэхэ, шэлэхэ мэргэжэлдэ зорюута һураһан бэшэб. Бүри багаһаа эхилжэ, гоё һайханда эльгэтэй һэм. Ходол энэ тэрэ бүд хэдэржэ гү, али гоё үнгэтэй хубсаһа үмдэжэ наадаха, гэртэхинэйнгээ урда бэеэ харуулха дуратай байгааб. Һургуулиин наһанай болон оюутан ябахадаа, уран һайханай урилдаануудта ходол хабаададаг һэм. Дээдэ һургуулида һуража байхадаа, «Мисс альма-матер-2009» гэһэн урилдаанда түрүүлжэ гараһанаа мүнөөшье болотор тодоор һананаб. Гоо һайханай һалбарида яагаашье һаа, хабаатай байһамби. Сүлөө сагтаа Интернедэй аргаар элдэб янзын һуралсалнуудые гараһан гээшэб. Тэрэ һуралсал гарахадаа, юун намда хэрэгтэйб гэһэн асуудалда харюу оложо шадааб. Юрэ хубсаһа шэлэхэдэ, балай хүндэ бэшэ һаа, тэрэнээ Инстаграмда олондо хөөрэжэ ойлгуулха гээшэнь бэрхэтэйхэн байгаа. Хубсаһа яажа хүндэ тааруулхаб гэжэ һуралсал гараад, тэрэ дороо Интернедтэ тэрэнээ яажа тараахаб гэһэн һуралсал гараха гэжэ шиидээб. Мүнөө гансал хубсаһанай талаар хүдэлхэһөө гадуур СММ мэргэжэлтэй болонхойб. Инстаграмай хуудаһандамни 200 гаран хүн байһан һаа, мүнөө үдэрһөө үдэртэ олон болоно. Тэдэнэй тоо мүнөөдэрэй байдалаар 3 мянгада дүтэлжэ байна. Һүүлэй үедэ олон зон нам тухай мэдэхэ болоо, хубсаһанай зарим дэлгүүрнүүд тэдэнэй эд бараа олондо хөөрэжэ үгэхыемни уридаг болонхой.
- Иимэ үнгэтэй, тиимэ түхэлтэй хубсаһан танда таараха гэжэ яагаад ойлгонобта?
- Хүн бүхэн өөрын дабташагүй нюур шарайтай, бэетэй байдаг. Жэшээнь, нэгэ хубсаһан аб адли бэетэй хоёр хүндэ таарадаггүй. Нэгэндэнь абаһаар тааража һууха, гоёор харагдаха, харин нүгөөдэдэнь яагаашье һаатнай таарахагүй. Хүнэй шарай, бэеын нугалбари гэжэ байха, тэрээнһэээ гадуур хүнэй нюдэнһөө, зан абариһаашье ехэ юумэн дулдыдаха.
- Танай нюур-хуудаһа харахада, та үшөө хүнэй гэртэ айлшалжа, тэдэнэй хубсаһа шэнжэлээд, юуниинь хэрэгтэйб, ямар хубсаһа үмдөөгүй һаа дээрэб гэһэн заабаринуудые үгэдэг байнат.
- Тиимэ. Хүнэй урилгаар гэртэнь ерэхэдээ, бүхы хубсаһыень гаргажа харадаг, шэнжэлдэгбди. Ямар үнгэ зүһэтэй хубсаһан танай шарайда таарахаб гэжэ ойлгуулдагби. Үшөө тэрээнһээ гадуур дэлгүүр ошожо наймаа хэхэдэнь, туһалдаг, заажа үгэдэг гээшэб. Мүнөө үедэ гансал эхэнэрнүүд хубсаһа тааруулха мэргэжэлтэдтэ хандадаг бэшэ, харин эрэшүүлшье иимэ юумэндэ дуратай байдаг. Захил хэһэн хүнтэй уулзахын урда тэрэнэй гэрэл зураг хараад, таараха хубсаһануудыень дэлгүүрээр ябажа бэдэрдэг гээшэб. Шэнжэлгэ хэжэ ябаһанай удаа уулзажа, бэдэржэ олоһоноо дурадханаб. Иимэ ажал хэжэ ябахадамни, минии сэдьхэл зүрхэндэ ехэл дүтэ, юундэб гэхэдэ, хубсаһанай оршолон гээшэ эгээл минии юртэмсэ гэхэдэ болохо. Гоё һайхан хубсаһанай ашаар хүнэй түхэл шарай ондоо болгохоһоо гадна бидэ үнэн нүхэд шэнги харилсанабди. Хажуугаарнь хүнэй сэдьхэлэй шэнжэ болон һанаа бодолыень заһан тааруулха (психолог) мэргэжэлтэншье болоноб гэхэдэ, алдуу болохогүй. Зарим улад сэдьхэлэйнгээ байдалһаа боложо, өөртөө таарахагүй, юрэдөө үзэмжэгүй гэхээр хубсаһа хэдэрээд ябадаг. Тиимэһээ хубсаһа шэлэн тааруулхада, сэдьхэлэй байдал ойлгохо шэглэлээр һуралсал гаража байнаб даа.
- Видео буулгахадатнай, хэн туһалнаб? Ехэ саг абана гү? Нарай багатай хүндэ иимэ ажал эрхилхэдэ, хэр хүндэ байнаб?
- Хэншье туһалнагүй, үнэн туһамаршамни гурбан хүлтэй тулгамни (штатив). Сагайнгаа хубаари һайнаар табяад, үшөө тиихэдэ гэртэхинэй дэмжэжэ байхада, бараг шэнги байна. Нарайтай болоод байһан эхэнэрнүүдтэ эгээл таарамжатай ажал гэжэ хэлэхэ байнаб. Зарим зон гансал иимэ ажал хээд ябадаг, тэдэнэй гол хүдэлмэринь болодог.
- Сэдьхэлэйнгээ татабаряар дуратай ажалаа эрхилжэ ябанат. Та өөрөө ямар мэргэжэлтэй гээшэбта? Өөр тухайгаа тобшохоноор хөөрэжэ үгыт?
- Дээдэ һургуулитайб. Хилын албанай мэргэжэлтэн боложо гараа һэм. «Байкальская гавань» гэһэн аяншалгын эмхидэ ажаллажа байһанаа багатай болоод, мүнөө гэртээ байнаб. Уг гарбалаараа аршаан булагуудаараа холо ойгуур сууда гаранхай түхэреэн һайхан Түнхэн нютагһааб. Хүн зоноор харилсаха, танилсаха дуратай хүм.
- Зай, һайнта даа! Хэжэ байһан ажалтнай урагшатай ябажа байг лэ даа. Бүхы дэлхэйн һайханиие хүсэнэб!
Автор: Булат БАДМАЕВ
Фото: Надежда Семёновагай дурадхаһан гэрэл зурагууд
