653
Гадна Сиридэшье алдалан унаһан сэрэгшэдэй гэр бүлэнүүдтэ хасардалгын ажал эмхидхэхые даалгаа.
Наһа барагшадай гэр бүлые хасардаха шэглэл Ниигэмэй хүгжэлтын яаманда даалгагдана. Тэдэниие ганса мүнөөдэр һанаха бэшэ, саашадаашье саг үргэлжэ хараа дороо байлгаха хэрэгтэй. Тиихэдээ хаана хүдэлнэ, али хүдэлнэгүй гү, хэды үхибүүд бэ, ямар туһа хэрэгтэйб гэһэн бүхы мэдээсэл бүридхэхэ хэрэгтэй. Эдэ гэр бүлэнүүдые хасардахабди. Ниигэмэй яаманиие хотодошье, аймагуудташье энэ асуудал хиналта дороо абахыень даалганаб. Украинада алдалан унаһашуулһаа гадуур, үшөө Сиридэ наһа бараһан зон нэмэгдэбэ. Адли тэгшээр хасардаха болонобди, - гэжэ Буряадай Толгойлогшо онсолон тэмдэглээ.
Алексей Цыденовэй тэмдэглэһээр, Ородой Холбоото Уласай Юрэнхылэгшэ Владимир Путинай даабаряар федеральна хэмжээндэ тусхай операциин үедэ наһа бараһан сэрэгшэдэй гэр бүлэнүүдтэ мүнхэлэлгын 7,4 сая түхэригэй түлбэри нэгэ дахин үгтэхэ. Тэрээнһээ гадуур Юрэнхылэгшын даабаряар тусхай операцида хабаадажа наһа бараһан сэрэгшэдэй болон хүсэрхы албануудай мэргэжэлтэдэй гэр бүлэнүүдтэ 5 сая түхэриг хэмжээнэй нэмэлтэ түлбэри байгуулагдаа. Региональна хэмжээндэ хуулиин тогтоол, тэрэ тоодо Болбосоролой яаманай шугамаар гэр бүлэнүүдые дэмжэлгээр бэлдэгдээ.
Бидэ гэр бүлэнүүдтэ туһалха, дэмжэхэ хуулиин түлэб бэлдээбди. Үхибүүдыень хүүгэдэй сэсэрлигтэ ээлжээгүйгөөр оруулхабди. Республикын абаһан уялгаар наһа бараһан сэрэгшэдэй дээдэ һургуулида орохо үхибүүдэй ЕГЭ-гэй баллнуудаар бюджетнэ һууринуудта орожо шадаагүй һаань, дуратай мэргэжэлдээ тусхай шэглэлээр һурахаарнь хэлсээ баталхабди. Сэрэгшэдэй наһанайнь нүхэрэй ажал олоходонь, өөрынгөө мэргэжэлээр ажалда ороходонь туһалхабди, - гэжэ Алексей Цыденов мэдүүлээ.
Сэрэгэйнгээ уялга дүүргэхэдээ алдалан унаһан сэрэгшэдэй гэр бүлэнүүдэй гэшүүд бүридхэгдэжэ, мүнөө байһан хууляар ниигэмэй дэмжэлгын хэмжээнүүд үзүүлэгдэхэ – үхибүүдтэ түлбэринүүд, пенсионно жасын шугамаар хэмжээнүүд, ниигэмэй талаар хэрэгтэй ажалнуудта (гэр тойроной хэрэгүүд) туһа хүргэлгэ, эмнэлгын болон һуралсалай талаар хангалга.
Хууляар хараалагдаһан бүхы хэмжээнүүд хүргэгдэхэ, энээниие саг үргэлжэ хинажа байхабди. Муниципальна байгуулалтануудай хүтэлбэрилэгшэдтэй тусхай зүблөөн үнгэргэгдэхэ, гэр бүлэнүүдые дэмжэлгые үшөө дахин хэлсэхэбди, - гэжэ Буряадай ниигэмые хамгаалгын сайд Татьяна Быкова тайлбарилаа.
Тэрээнһээ гадуур, Украинада, Донецкэ Арадай Республикада ба Луганска Арадай Республикада үнгэргэгдэжэ байһан сэрэгэй тусхай операцида хабаадаһан сэрэгшые байлдаануудай ветеранай зэргэ олгогдохо болгохо. Хуулида нэмэлтэнүүдэй оруулагдахада, Украинада үнгэргэгдэжэ байһан тусхай операцида хабаадагшадта Россиин хуулинуудаар ЖКХ-гай түлэлгэнүүдээр хүнгэлэлтэнүүд болон ниигэмэй талаар бэшэшье дэмжэлгэнүүд үзүүлэгдэжэ байха болоно.
