Загаһа барижа урилдаа

- «Байгалай загаһашалга» эмхитэйгээр  үнгэрөө. “Байкальская рыбалка”, “Байкальская миля”, “Байкальский лыжный марафон” - эдэ бүгэдэ хэмжээ ябуулганууд олон зониие һонирхуулан, нэн түрүүн манай бага олзын хэрэг эрхилэлгэдэ түлхисэ боложо үгэнэ гэжэ хэлэхэ байнаб. Эндэхи зошод буудалнууд дүүрэнхэй, айлшадай гэрнүүд хуу эзэлээтэй, хоол баридаг газарнууд хүдэлжэ байна. Иимэ хэмжээ ябуулгануудай манда олон лэ байбал, республикымнай хүгжэлтэдэ бүри һайн байха,  шухала экономическа асуудал шиидхэгдэнэ ха юм, - гэжэ Буряадай Толгойлогшо тэмдэглээ.

Хэмжээ ябуулганай үедэ Алексей Цыденов омоли барилгаар хүнгэлэлтэнүүд тухай мэдээсээ.

- Омоли загаһа бариха талаар ажал ябуулжа байнабди гэжэ хэлэхэ хэрэгтэй. Тусхай газарнуудта омоли хахууляар барилга энэ зундаа зүбшөөгдэхэ. Энэл жэлһээ мүн һайн дуранай загаһашалга эхилхэ. Гэхэтэй хамта хизаарлалтануудынь олон байха, - гэжэ Алексей Цыденов тэмдэглээ.

Байгша 2022 оной «Байгалай загаһашалгада» 205 команда хабаадаа, тэрэ тоодо эхэнэрнүүдэй 21 команда. Москваһаа Шэтэ хүрэтэр газар нютагуудһаа загаһашад ерээ. Хабаадагшадай наһанай хэмжээн үргэн байгаа: эгээл аха захатан – 75 наһатай, харин эгээл балшар загаһашан табатайхан байгаа. «Эдир загаһашан» гэһэн үхибүүдэй загаһашалга жэлһээ жэлдэ олоной һонирхол ехээр татана. Энэ удаа 70 гаран үхибүүд хабаадаа.

Арбан долоодохиёо үнгэргэгдэһэн энэ хэмжээ ябуулгада Россиин болбосоролой сайдай орлогшо Андрей Николаев хүрэжэ ерээ.

- Манда хүүгэдэй сэсэрлигүүд, һургуулинууд олоор баригдана гэжэ дуулаа ёһотойт. Һүүлэй жэлнүүдтэ 17 һургуули, хүүгэдэй 27 сэсэрлиг баряабди. Имагтал эдэ асуудалнуудые Андрей Викторович харгалзалдаг. Тиигээд лэ тэрэ өөрөө хэжэ байһан ажалыемнай шалгахаяа ерэбэл даа. Хүндэтэ айлшандаа мүнөө бидэ Байгалай загаһашалга харуулнабди, - гэжэ Буряадай Толгойлогшо тэмдэглээ.

Байгал дээрэ үнгэргэгдэһэн загаһа барилган Андрей Николаевта һайшаагдаа.

- Яһала үзэмжэтэ,  гоё һайхан болон сэдьхэлэй һайн амаралта. Би ямар нэгэн тамардаг Байгалай һургуулиин түлэб байгуулхабди гэжэ найдуулнагүйб,  гэбэшье энээн тухай бидэ бодохобди. Һайн лэ даа, яһала һайнаар эхилээт. Энэ ехэ Байгалай загаһашалгада эдэбхитэйгээр хабаадажа байһан хүнүүдые хараад, баярлахаар. Би өөрөө загаһашалдаггүйб, теэд мүнөө һаналаа табибаб, - гэжэ Андрей Николаев хэлээ.

Энэ жэлдэ баригдаһан загаһан бүхыдөө 8 кг болоо. Урилдаанай гол шанда  573 грамм загаһа бариһан Улаан-Үдын  «Торнадо 2» команда хүртэбэ.