Буряадтай танилсуулха бэлэг

Тус эблэлые Буряадта байгуулаад хүтэлбэрилжэ ябаһан Людмила Доржиевагай мэдээсэһээр, Россиин хэмжээндэ бэеэ харуулжа шадаһан бэрхэ басагад “Артек” лагерьта амархаяа зорихонь. Крымдэ Буряадай үдэрнүүдые тэдэ эмхидхэхэ юм. Эгээл тиимэһээ Ирина Нимажаповнатай уулзажа харилсаһаниинь саашанхи ябадалдань ехэ туһатай байха.

Улаан-Үдэдэ һаяын сагта болохо хэмжээ ябуулганууд тухай үндэр тушаалтан үхибүүдтэ хөөрэжэ үгөө. Илангаяа Буряадта зарлагдаха Сибириин болон Алас Дурнын сэдхүүлшэдэй форум тэдэнэй һонирхол татаа.  Уулзалгын түгэсхэлдэ эдир сэдхүүлшэдтэ Хурамхаанһаа ерэһэн үндэһэн сувенир Ирина Доржиева бэлэглэһэн байна. “Гэрхэн соохи шагайнууд «Артек» лагерьта бидэндэ угаа хэрэгтэй болохо – үндэһэн наадаараа хариин зониие һонирхуулхабди”, - гэжэ Сэлмэг Абидуева баярлана.