Туһатай лаборатори

Байгал далайе зандань үлөөхэ үүргэтэй федеральна түсэлэй шугамаар мүнөө сагай эрилтэдэ таарама шэнэ техникэ болон хэрэгсэлнүүд тус лабораторидо абтаба.  Байгал далайн  зарим  газарнуудта хүрэжэ  ошохонь бэрхэшээлтэй. Эгээл иимэ газарнуудһаа мэргэжэлтэд биоматериал абажа, лабораторидоо  шалгаха аргатай болобо гээшэ. Энэнь хуули хазагайруулан модо отологшодтой тэмсэхэ  хэрэгтэ туһатай гээд хэлэгдэнэ.

Россиин Ой модоной агентствын хүтэлбэрилэгшэ Иван Советников Буряад Улас руу албанай хэрэгээр ерэхэдээ, шэнэ лаборатори орожо хараба.

 

- Буряадай, Яхадай ой модоной ургамалнуудай, хорхой шумуулнуудай янзануудые элирүүлхэ зорилго лаборатори урдаа табина. Тэрэнэй ашаар хуули хазагайруулан модо отололго  тэрэ зандаа мэдэгдэхэ  болоно. Түгсүүл тайрагдаһан модон хоёрые сасуулан, нэгэ ургамал байгаа гү, али үгы  гү гэжэ хэлэхэ аргатай болохобди. Шэнэ лаборатори мүнөө тон хэрэгтэй, тэрэнэй туһа сэгнэшэгүй, - гэжэ тэрэ тэмдэглээ.

Лабораториин шэнэ хэрэгсэлнүүдээр ойн ургамалнуудай ДНК-анализууд хэгдэхэһээ гадна хоро хүргэдэг хорхойнуудые элирүүлнэ. 

- Байгал далай аршалха түсэлэй шугамаар лабораториин шэнэ хэрэгсэлнүүдһээ гадна «УАЗ» түхэлэй - 5, зониие, ашаа  шэрэхэ 2 автомобильнуудтай, катертай, саһатайшье, намагтайшье газараар ябадаг машинатай  болообди. Тиимэһээ олон хоногой туршада ойгоор ябаха арга манда олгогдобо. Хүнэй байха тааруу  байдал автомашинанууд соо зохёогдонхой, - гэжэ  Буряадай Ой хамгаалгын түбэй хүтэлбэрилэгшэ Александр Середкин хэлэбэ.