Юрий Гагаринай нэрэ олгуулагдахань

Һонирхолтой гэхэдэ, Хориин 2-дохи һургуулида Юрий Гагаринай нэрэ олгуулха тухай шиидхэбэри абтанхай. Тиимэһээ иимэ хэмжээ ябуулганууд һургуулида ходо  үнгэргэгдэжэ байхаар хараалагданхай.

Түрүүшын космонавт замбуулинда 108 минутын хугасаада ниидээ бэлэй гээд һануулая. Юрий Гагарин тухай мэдээсэлнүүд  һурагшадта нэгэдэмэл хэшээлэй үедэ дамжуулагдаа. Һонирхолтой баримтата фильм сугларагшад хараһан байна.

Габшагай долоон хоногой үедэ класс бүхэнэй хүтэлбэрилэгшэд өөрын хэмжээнүүдые эмхидхээ. Жэшээлбэл, багшын ажалай ветеран Любовь Алексеевна Жибарева, аймагай номой сангай хүдэлмэрилэгшэ Наталья Бадмаевна Сультимова гэгшэд “Гагаринай хэшээл” 8-дахи классай үхибүүдтэ һонирхолтойгоор үнгэргөө. Космонавтикада зорюулагдажа бэшэһэн номуудай үзэсхэлэн дэлгээгдээ.

- “Звездный городок” гү, али МКС нэгэ дахин ошожо хараа һаа, гоё байгаа, - һургуулиин олон үхибүүдэй дунда габшагай долоон хоногой удаа иигэжэ хөөрэлдэхэ  ушарнууд олошороо.

 

Замбуулинтай ниилээд…

Юрий Алексеевич Гагаринай нэрэ Хориин 2-дохи һургуулида олгуулха тухай һуралсалай гуламтын захирал Лидия Ёндоновна Бадархановатай хөөрэлдэһэн байнабди.

- Һургуулидаа мэдээжэ хүнэй нэрэ олгуулха тухай ажал бидэ үнинэй ябуулнабди. Хоринск һууринда 1-дэхи һургуули нютагаймнай хүбүүн, Советскэ Союзай Герой Дарма Жанаевич Жанаевай нэрэ даагаад ябана. Теэд нютагтамнай ондоо иимэ Герой болоһон хүн үгы бшуу. Тиимэһээ Болбосоролой болон эрдэм ухаанай яаманай зууршалга хараабди. Ородой гү, али СССР-эй Герой болоһон, хэдэн үе арад зондо мэдээжэ хүн байха ёһотой гэжэ тэндэнь бэшээтэй. Һургуулиингаа багшанартай, хүдэлмэрилэгшэдтэй, һурагшадтай, түрэлхидтэй суглаануудые энэ талаар үнгэргөөбди. Хэнэй нэрэ һургуулидаа олгуулхаб гэжэ хөөрэлдөө эмхидхээбди. Һургуулиингаа хүтэлбэриин эблэлэй түрүүлэгшэ, Анаагай дасанай шэрээтэ Лэгсэг лама Владимир Баирович Дарижаповтай нягта харилсаа холбоотойгоор энэ ажал ябуулаабди. Юундэб даа Юрий Гагаринай нэрэ түрүүн толгойдомнай  ороодхёо, - гэжэ Лидия Ёндоновна хөөрэнэ.

Захиралай хэлэһээр, нютагай үхибүүд болон ехэшүүл хэр зэргэ түрүүшын космонавтын нэрэ һанаад ябанаб гэжэ шэнжэлгэ хэгдээ. Һургуулиин үхибүүдэй ехэнхи хуби Юрий Гагарин хэн бэ гэжэ хэлэжэ шадаагүй.

- Һуралсалайнгаа гуламтада ямар бэ даа мэдээжэ хүнэй нэрэ олгуулхын түлөө түрэл гаралһаань зүбшөөл абаха хэрэгтэй. Юрий Алексеевичэй түрэһэн басаган Елена Юрьевна Гагарина мүнөө үедэ Москвагай Кремлиин музейн генеральна захиралаар хүдэлдэг. 2021 ондо Москва ошоод, уулзажа шадаагүйбди. Һургуули, үнгэргэжэ байһан патриотическа хүмүүжүүлгэ тухай мэдээсэлнүүдые Елена Юрьевнада эльгээгээбди. Манай бүтээлнүүдтэй танилсаад, ехэ баярлаһанаа мэдүүлээ. Тиигэжэ зүбшөөл үгэһэн байна, - гээд, Лидия Бадарханова хөөрөөгөө үргэлжэлүүлнэ.

Мартын 22-то һургуулиин Уставта нэмэлтэнүүд оруулагдаа. Һуралсалай лицензи тухай шэнэ данса абаха мэдүүлгэ тусхай албанда эльгээгдээ.

Апрелиин 20-до һуралсалай гуламтада Юрий Гагаринай нэрэ олгуулһан ушараар ехэ найр наадан Хоринск һууринда болохоор хараалагдана. Буряадай мэдээжэ скульптор Вячеслав Бухаевай бүтээһэн Гагаринай дүрэ табигдаха. Энэ хэмжээ ябуулгада Ород гүрэнэй космонавт уригданхай, нэрыень эмхидхэгшэд хэлэнэгүй.