Арад зониие нэгэдүүлһэн авто-жагсаал

–Мүнөө сагта нацизм дахин бодожо байна, тэрэниие үндэһөөрнь усадхаха  хэрэгтэй. Владивостогһоо Калининград хүрэтэр манай арад зон нэгэ нюдарга мэтэ хамтадаа гэжэ бусад гүрэнүүд хаража байг. Автопробег энээниие гэршэлнэ, – гээд, уласай Толгойлогшо Алексей Цыденов  хэлээ.

Примориин хизаарһаа гараһан автоколоннодо Хабаровскын, Амурай хизаарнуудай, Еврейн автономито тойрогой, Байгал шадарай нютагуудай  эдэбхитэд  оролсоно. Энэ хэмжээ ябуулгада Буряадай профсоюзай, “Боевое братство» эмхиинхид, Буряадай автоспортын федерациинхид болон хотын юрын ажаһуугшад орохо дураяа мэдүүлээ.

-Буряад Уласай арад зондо һайниие хүргэхэ байнаб. Профсоюзуудай эдэбхитэдтэ баяраа мэдүүлнэб. Россиин Зэбсэгтэ хүсэтэниие, Россиин Юрэнхылэгшэ Владимир Путиниие дэмжэхэ гол зорилго урдаа табинхайбди. Мүнөө сэрэгэй тусхай ябуулгада хабаадажа байһан баатар хүбүүдэй түлөө булта хамтарнабди. Баруун гүрэнүүдэй хэдышье манай гүрэндэ хизаарлалта хэжэ байгаашье һаань,  бидэ диилэхэбди, бидэ шанга арад зомди, – гэжэ Россиин дулдыданги бэшэ профсоюзуудай түрүүлэгшын орлогшо Александр Шершуков хэлээ.

Автопробег  майн 9-дэ Мамайн Добуун дээрэ түгэсэхэ. Тэндэ Илалтын һайндэртэ зорюулагдаһан баярай хэмжээ ябуулганууд түсэблэгдэнхэй.