665
-Шэнэ һургуулинуудай, эмнэлгын газарнуудай барилга Юрэнхылэгшэ Владимир Владимирович Путинай туһаар, тэрэнэй даабаряар хэгдэнэ. Мүнөөдэрэй байдалаар бидэ шэнэ 76 ФАП, амбулатори ашаглалда тушаагаабди, - гэжэ Буряадай Толгойлогшо Алексей Цыденов тэмдэглээ.
Посели һууринай амбулаторидо дээдэ ба дунда шатын 12 эмшэд хүдэлхэ юм. 6000 ажаһуугшад гэрһээ холо ошонгүй, арга абаха эрхэтэй болобо гээшэ.
- 4 жэлэй саана эмнэлгын газар нээгдээ һэн. Мүнөө үшөө амбулатори үүдэеэ сэлибэ. Посели һууринай ажаһуугшадта тон хэрэгтэй барилганууд түгэсэжэ, уласай түүхэдэ оробо, - гэжэ амбулаториие даагша Арюна Санжиева хэлэбэ.
300 дүрбэлжэн метрэй талмайда үбшэнтэдые угтан абаха кабинедүүд, эмэй сан, түргэн туһаламжын болон тарилга хэхэ таһагууд зохёогдонхой.
- 50 жэлэй саана иишээ зөөжэ ерэхэдэмни, оройдоол 70 үрхэ айл байһан юм. 200 хүн ажаһуужа байгаа. Тойроод - хооһон тала. 5 хүнэй ороходо уйтан болошодог медпункт хүдэлдэг һэн. Мүнөө 2 амбулаторитой болошобобди. Ехэ баяртайб, - гэжэ Посели һууринай ажаһуугша Изабелла Лавренко хөөрэбэ.
5 мянган ажаһуугшадтай Хойтобэе һууринда мүн лэ эмнэлгын газар нээгдэбэ.
Үдэр соо 50 хүниие угтан абаха аргатай амбулатори соо мүнөө сагай хэрэгсэлнүүд табигданхай, эмшэдтэ тааруу зохид байдал зохёогдонхой.
Һүүлэй жэлнүүдтэ Ивалгын аймагта 5 амбулатори ашаглалда тушаагдаа. Гэхэтэй хамта Буряадта хүдөөгэй эмнэлгын газарнууд үшөө баригдаха, һэльбэн шэнэлэгдэхэ, авто-унаануудаар хангагдаха.
Автор: Янжима ДАРМАЕВА
Фото: Буряад Уласай засагай сайтһаа
