Сэдхүүлшэдэй уулзалга

Тус һургуули 2008 онһоо Россиин ниигэмэй үүсхэлэй жаса ТАСС-ай мэргэжэлтэдэй аша туһаар зарлана. Эды хугасаада 4 халаанда 300 сэдхүүлшэд мэргэжэлээ дээшэлүүлжэ шадаа. Буряадай сэдхүүлшэдтэ, Хэблэлэй албангуудай ажалшадта нютагтаа һуралсал гараха хоморой арга боломжо Засагай газар олгоо.

ШЭНЭ ЭРИЛТЭНҮҮД  

Хоног бүхэндэ хорилтонуудай нэмэгдэжэ байһан сагта яагаад ажалаа ябуулхаб? Социальна сүлжээнүүдэй хаагдахада, уншагшадтаяа яагаад холбоогоо таһалхагүйб? Эдэ асуудалнуудта харюу спикернүүд – ТАСС-ай, “РИА Новости” агентствэнүүдэй, “Ариг Ус” телекомпаниин түлөөлэгшэд бэдэрээд туршаа.

“Фейсбук” болон “Инстаграм” сүлжээнүүдэй үндэһэн байгуулгые экстремис һэдэбтэй гэжэ тоолоод, байгша оной март һарын эсэс багаар ажаябуулгыень Росси дотор хориһон байна. Тэрэнэй хойшолон – социальна сүлжээнүүдэй хүсөөр хоолойгоо тэжээдэг сэдхүүлшэд ажалгүй үлэшөө. Гадна уншагшадыньшье үншэршөө. Тэдэнээ бүримүһэн алдахагүйн тулада блогернууд телеграм-һубагуудые нээжэ эхилээ. Энэ ехэ һонин үзэгдэл гэжэ һургуули гарагшад тэмдэглээ.

«ВКонтакте», «Одноклассники» сүлжээнүүдтэ заримашуул эдэбхижэжэ эхилээ. Тэрэ сүлжээнүүдтэ худал аккаунт байгуулхын аргагүй – тэрээндэнь голхорһон зон байна.

Теэдшье социальна сүлжээнүүдэй һуладаһан сагта олондо мэдээсэлгын хэрэгсэлнүүдэй хүсэн улам шангарха ёһотой гээд хүлеэгдэнэ.    

ГАРШАГУУД

ТАСС-ай можо нютагуудай мэдээсэлнүүдэй редакциие хүтэлбэрилэгшэ Андрей Цицинов гаршагууд тухай ехэ һонин һуралсал хээ. Ганса мэдээсэлнүүдые тараадаг агентствэнүүдтэ һуралсалынь таарамжатай байгаа. Тэдэндэ гаршагууд соо гол мэдээсэлынь үгтэнэ ха юм. Тиимэһээ нэрлүүлэгшэ ба хэлэгшэтэй дүүрэн мэдүүлэлһээ бүридэһэн байха ёһотой. Түхэлөөрөө 90 тэмдэгһээ дээшэ байха ёһогүй.    

ХУДАЛ МЭДЭЭ (ФЕЙК)

Гол тренер Светлана Иконникова яагаад худал мэдээ илгахаб гэжэ ойлгуулжа үгөө. Һүүлэй сагта фейкнүүд дэлгэрэнги болонхой. Бэедээ анхарал татуулхын, сэгнүүлхын тулада худал мэдээнүүдые заримашуул тараана. Тиихэдээ тэдэ хүнэй сэдьхэлэй эгээл сэнтэй талануудые хадхахаяа оролдоно. Хорон эдеэн, эм дом тухай худал мэдээнүүдые социальна сүлжээн соо ходо харахаар. Хэзээ, хаана, хэн хэлэнэб гээшэнь тодо бэшэ байдаг.  

 МЭДЭЭСЭЛЭЙ УУРХАЙ СОО

Энэ медиа-һургуулиин үедэ ашагтай уулзалганууд болоо. Илангаяа гүрэнэй мэдээсэлэй гол албан болохо ТАСС-ай һуралсалай түбэй түлөөлэгшэдтэй харилсаха арга тудаа. Тэрэ түбые ударидагша Валентина Колесникова, гол мэргэжэлтэн Улана Наранова гэгшэд Буряадтай анха түрүүшынхиеэ танилсаа.

• Түрэл нюурнуудые хараад, зосоом наран гараһандал болоо. Манай Хальмагта үргэлжэ тала ха юм. Танай байгаали илгаатай байна, - гээд, Улана Наранова тэмдэглэнэ. Хальмаг Уласай залуу басаган зургаан жэлэй туршада ТАСС-та хүдэлжэ байна. Москвагай хэлэ шэнжэлгын ехэ һургуули түгэсхэһэн сагһаа гүрэнэй гол агентствын ажалда шэлжэн ороо.

ТАСС-ай бүридэлдэ һуралсалай түб байгуулагдаһаар 8 жэл гүйсөө. Ажалшадынь үргэлжэ мэргэжэлээ дээшэлүүлжэ байдаг. Тиигэнгүй болохогүй – бүхы юумэн ехэ хурдаар хубилна ха юм гээд, Валентина Колесникова ойлгуулна.

Аяар 2 мянга гаран хүдэлмэрилэгшэдтэй ТАСС-та хүрэхэ албан Росси гүрэн соо үгы ха юм.

ТОБШОЛОЛ

Россиин ниислэлһээ ерэһэн дээдын гарай мэргэжэлтэдэй мүнөөдэрэй ажаябуулгын онсо талануудые зүбшэн хэлсэжэ байхада, ехэ һонин байгаа. Нэгэ хэлэтэй, хараа бодолтой гуурһа нэгэтэнэй дунда һуралсал гарахань ехэ харюусалгатайшье, хүндэтэйшье.