559
Урдань буряад арад хүнэй һэе газар доро буладаггүй, харин холо хүдөө газарта орхидог байһан гэжэ мэдээжэ. Тэрэнь байгаалиин эрьесэ руу нэбтэрэн ородог һаабза. Тиимэһээ хүнэй һэе шатааха аргые буряад арад хориногүй. Буддын шажанай ёһооршье энэ арга зүбшөөгдэнэ гээд, Бандида хамба лама Дамба Аюшеев тэмдэглэнэ.
Хүдөөлүүлхэ газар сүлөөлжэ, Улаан-Үдэ хотые тойроод, ой модо отолхо баатай бологдоно. Гадна газар доро булагдаһан хүнэй һэе хожом хойнодоо уудаг уһан доро орожо, халдабарита үбшэнгүүдэй уурхай боложо магад. Энээн тухай крематориин захирал Соёлма Дашимолонова һануулна.
Буряад арад хүдөө табиһан газарые эрьен хаража байдаггүй. Тиимэһээ шатааһан һэеын үлэгдэл “Южный” газарта оршодог гашуудалай ханада оруулха аргатай.
Үнэ сэнгынгээ талааршье хямда болоно гээд, крематориин ажалшад тэмдэглэнэ. Хүнэй һэе шатааһанай дараа сүүдхэ болоод, үлэгдэлыень түрэлхидтэнь үгэхэ һаа, 24 мянган түхэриг түлэхэ хэрэгтэй. Харин шууд барюулха һаа, 27 мянган түхэриг түлэхэ хэрэгтэй.
Хэрбэеэ газар доро булаха болоо һаа, хүшөө табиха, хорёо бариха болоно ха юмта.
Хүнэй һэе шатаахада, агаарта ямаршье хорон бодосууд таранагүй – дээдын шанарай оньһон түхеэрэлгэнүүд табяатай бшуу. Тиимэһээ крематоритой зэргэлээд ажаһуудаг Спиртзаводскойн харгын хажуугаархи айлнууд һанаагаа зобоһоной хэрэггүй. Хандаха хаягууд: Спиртзаводскойн тракт, 6а. Тел.: 8 (3012) 57-14-57. Мэдүүлгэнүүдые хүлеэн абадаг нэмэлтэ пункт Павловай гудамжа, 23 хаягаар оршоно.
“Буряад үнэн” мэдээсэлэй албан
Фото: Соёлма Дашимолоновагай дурадхаһан гэрэл зураг
