Номой санда хэнэй нэрэ олгуулхаб

Буряад Уласай Соёлой яаман үндэhэтэнэй номой санда Буряадай түрүү ниитын ажал ябуулагшадай нэгэнэй нэрэ олгохо тухай hанал хуряалга эмхидхэбэ. hанал хуряалга майн 15 болотор үнгэрхэ юм. 

Соелой сайд Соелма Дагаевагай хэлэhээр, хүн зоной олон мэдүүлгэ оруулхада, олоной дунда hанал хуряалга үнгэргэхэ гэжэ Буряад уласай соелой яаман шиидэбэ.

Буряадай үндэhэтэнэй номой сангай байшанда hэльбэн шэнэлгын ажал дүүрэхэ тээшээ боложо, hаяар олон тоото уншагшадайнгаа урда үүдээ сэлин абахаар бэлэн боложо байнхай.

- Түрүүн манай номой сан 1965 онhоо 1991 он болотор Уласай эрдэмэй Максим Горькиин нэрэмжэтэ байhан, - гэжэ Соёлма Баяртуевна хэлэнэ. – 1991 ондо, номой сангай байгуулагдаhаар 110 жэлэй ойдо Үндэhэтэнэй номой сан болоhон түүхэтэй. Тэрэ гэhэнhээ хойшо хэнэй нэрэ олгуулха гэhэн асуудал олониие зобоогоо. Тиимэhээ мүнөө, олоной хабаадалгатайгаар hанал хуряалга эмхидхэбэбди.  

Дуугаа үгэхэ гэбэл ссылкээр орожо, дуратай хүнэйнгээ хажууда даража, тэрэнээ  эльгээхэдэ болоно. Үгтэhэн нэрэнүүд сооhоо танай hанаанда таараха хүнэй үгы болобол, өөрын дурадхал оруулхада болоно. Хэнэ нэрэнүүд үгтэнхэйб гэбэл: 1. Николай Дамдинов 2. Намжил Нимбуев 3. Дондок Улзытуев 4. Даширабдан Батожабай 5. Элбек-Доржи Ринчино 6. Агван Доржиев 7. Дамба Жалсараев 8. Намжил Балдано 9. Леонид Потапов 10. Юрий Хараев гэгшэд болоно.
Гэбэшье, «Буряадай Уласай Үндэhэтэнэй номой сан» гэhэн нэрынь үлээхын түлөө дуугаа үгэжэ болоно.