Оюутадай амжалта

Эрхим бэрхэ оюутадые элирүүлжэ, саашадань арга боломжоороо дэмжэхэ, эрхим  мэргэжэлтэй болгохо зорилготойгоор энэ харалган эмхидхэгдээ гэжэ хэлэе.
Үнгэрһэн жэлэй ноябрь һарада соносхогдоһон харалганда Алас Дурна зүгэй федеральна тойрогой һуралсалай эмхинүүдтэ һурадаг оюутад мүн хабаадана. Эндэ хабаадаха тухайгаа Ород Уласай 84 можо нютагуудһаа 26955 оюутан мэдүүлгэ бариһан байна. Байгша оной февраль һарада удаадахи шата соносхогдожо, гурбан ехэ хубиһаа бүридөө. Уридшалан дүнгүүдээр, Буряад Уласаа түлөөлһэн хоёр оюутад ехэ амжалтатайгаар ээлжээтэ шатануудые гараба. Буряадай багшанарай колледжын оюутан Алина Швайкина, Зүн Сибириин соёлой дээдэ һургуулиин оюутан Дарья Дедюро гэгшэд ехэ харюусалгатайгаар энэ хэрэгтэ хабаадажа, түрүүшүүлэй тоодо ороод байна.

Бэрхэшээлнүүдһээ гэдэргээ сухарингүй, урагшаа сэхэ ябаха шухала", - гээд Дарья Дедюро хэлэнэ.

Бүхэроссииин удхатай харалганда амжалта туйлаһан залуушуул саашадаа «Смена», «Океан» гэһэн хүүгэдэй түбүүдтэ мэргэжэлээ дээшэлүүлхэ, дүршэл ехэтэй болохо аргатай. Гадна Ород Улас дотороо аяншалжа, бэрхэ, урагшаа һанаатай залуушуултай танилсаха юм.