Түхэреэн жэлдэ-түрэл хэлээрээ

-Харагшадтнай үдэр бүри олошоржо байг. Хүршэ Үбэр Байгалай хизаарта болон Эрхүү можодо  ажаһууһан зон хараха аргатай         болог. Үдэр бүри танай дамжуулганууд улам һонирхолтой, удха шанартай боложо ургаг, - гэжэ Буряад Уласай Толгойлогшо Алексей Цыденов үндэһэн телевидениин ажалшадта хандаба.

-Түхэреэн жэлэй туршада харагшадайнгаа дура буляажа, тэдэнээ олошоруулаат. Эхэ буряад хэлэнэйнгээ хүгжэлтэдэ горитой хубитаяа оруулха гэһэн зорилготой  тус нэбтэрүүлгэ байгуулагдаһан юм, - гэжэ түхэреэн шэрээдэ мүн лэ хабаадалсаһан Арадай Хуралай Түрүүлэгшэ Владимир Павлов хэлэбэ.

Түрэл буряад хэлэн дээрээ залуушуулнай хөөрэлдэжэ ябаха, эхэ хэлэндээ дуратайгаар үндыхэ. Энээнэйл  түлөө һонирхолтой дамжуулганууд, нааданууд зохёогдоно. Түргэн сагай туршада бүридхэгдэһэн ажалшад түрүүшынгээ шагналнуудта,  мүн Баярай бэшэгүүдтэ хүртэбэ.

-Үшөө удхатай, һайн шанартай олон дамжуулгануудые тусхай  хэрэгсэлнүүдые (АСК) худалдажа абахадаа бүтээдэг болохобди гэжэ найданаб. Танай дэмжэлтэдэ ехэтэ найданабди. Харагшадаа олошоруулха ажал хэгдэжэл байна, - гэжэ «Буряад ТВ» -гэй захирал Виталий Раднаев хэлэбэ.

Буряад телевидениин  ажалшад баярай үгэнүүдые, амаршалгануудые тогтоон абаад, Буряад Уласай Толгойлогшо Алексей Цыденовтэ шагай наада бэлэглэбэ.