Тугнай намилзаба

Ургажа ябаһан залуу һүрэгөө Эхэ орондоо дуратайгаар үндылгэхэ зорилготой түсэл уласай байгуулагдаһан үдэртэй дашарамдуулан бэелүүлэгдэбэ.

 Утань - 3,  харин үргэниинь - 1,5 метр хэмжээтэй гүрэнэй һүлдэ болохо туг Улаан-Үдэ хотын ажаһуугшадай тон дуратайгаар ябадаг музейдэ үндэрлэбэ. Эгээл шухала энэ хэрэгтэ «Юнармия» эдиршүүлэй хүдэлөөнэй гэшүүд, «Дельфийские игры» гэһэн урилдаанда хабаадагшад болон һайн дуратанай хүдэлөөнэй гэшүүд хабаадалсаба. Буряад Уласай һүлдэ дуун доро эдэ хүүгэд тугаа үргэжэ намилзуулба.

 

-Хүндэтэ нүхэд! Буряад Уласайнгаа түрэһэн үдэрөөр та бүгэдэниие хани халуунаар амаршалнаб! Ерэхэ жэлдэ уласайнгаа 100 жэлэй ойн баяр тэмдэглэхэбди. Үнгэрһэн эдэ жэлнүүдэй хугасаада амаргүй һонирхолтой, алдартай, удха шанартай үйлэ хэрэгүүд болоһон байха юм. Эб найрамдалай һүлдэ болоһон тус музейн хүреэндэ тугаа намилзуулһамнай, ехэл удхатай. Ушарынь гэхэдэ, эб хамта ажаһуужа байгаа арадуудай үндэһэн түбүүд эндэ дурадхагданхай. Хасагууд, шэмээшэгүүд, эвенк болон буряад арадууд эбтэй эетэйгээр эндэ өөһэдынгөө үндэһэн байдал харууланхай. Хүндэтэ нүхэд! Уласаймнай туг хии мориндол намилзажа, аза талаан, хүгжэлтэ бидэндэ асаржа байхань болтогой! – гэжэ Буряад Уласай Соёлой яаманай сайд Соёлма Дагаева амаршалгын үгэ хэлэһэн байна.

Тус хэмжээ ябуулга Буряад Уласай һүлдэ дуунай һайхан аялга доро түгэсэһэн байна. Тэрэниие буряадаар Ород Уласай габьяата зүжэгшэн Дамба Занданов тон уранаар гүйсэдхөө.