Олоной һонирхол татаһаар

Тэрэ гэһээр 30 жэл үнгэршэбэ. Он жэлнүүдэй һубаряан соо коллективэй ажабайдалда олохон хубилалтанууд  болоо.  Түрүүшээр  90 гаран мэргэжэлтэд Агын телерадиокомпанида хүдэлдэг байһан юм. Дамжуулгануудай сагшье ехэ һэн. Һүүлэй үеын һонинууд, ажалай түрүүшүүлтэй, солотой нэрэтэй зоноор  уулзалганууд, тойрог дотор эмхидхэгдэһэн хэмжээ ябуулгануудһаа репортажууд, тоглолтонууд ажаһуугшадай һонирхол заатагүй татадаг һэн. Мүнөөшье  Агын тойрогой  ажаһуугшад телевидениин дамжуулгануудые ехэ анхаралтайгаар хараһаар, хүлеэһээр. Дамжуулга хүтэлэгшэд, сурбалжалагшад айл бүхэндэ дүтын түрэл, бодото гэшүүд мэтэ болонхой.

Сэдхүүлшэн, Оросой Холбоото Уласай соёлой габьяата хүдэлмэрилэгшэ, Шэтэ хотын ба Агын Буряадай автономито тойрогой хүндэтэ эрхэтэн, олон жэлэй туршада Шэтын телерадиокомитедэй  түрүүлэгшэ   Ефим Борисович Маликовта зорюулагдаһан Дурасхаалай самбар нээлгээр  30 жэлэй ойн баярай хэмжээ ябуулга эхи абаа. Энэл хүнэй эдэбхи үүсхэлээр тойрогой ниислэл Ага тосхондо телерадиокомплексын байшан баригдажа эхилһэн юм. Россиин соёлой габьяата хүдэлмэрилэгшэ, мэдээжэ уран зохёолшон Гарма Цырендашиев   олохон жэлэй туршада шэнэ коллектив хүтэлбэрилжэ, аша үрэтэйгөөр хүдэлөө.  Ахамад редактор Батожаргал Гармажаповай, телевидениин таһагые даагша Балдандоржи Жаповай  ударидалга доро хэды олон залуушуул далижааб, ажабайдалай үргэн харгыда гарааб!

 Дурасхаалта самбар нээхэ хүндэтэ эрхэдэ Шэтын телерадиокомпаниин түрүүлэгшэ Игорь Кунгуров, Агын телевиденидэ түрүүшын үдэрһөө хүдэлжэ байһан талаан бэлигтэй видео-буулгагша Бальжинима Цыденов гэгшэд хүртөө.  Баярай хэмжээ ябуулга «Амар сайн» театрай танхим соо үргэлжэлөө. Үбэр Байгалай хизаарай Засаай газарай түрүүлэгшын орлогшо, Агын Буряадай тойрогой захиргаанай хүтэлбэрилэгшэ Буянто Батомункуев  телевидениин коллектив, хүндэтэ амаралтада гараад байһан зониие халуунаар амаршалаад, нютагай түүхэдэ тэдэнэй оруулһан  аша габьяа тэмдэглээ.

 

-Таанадай хэжэ байһан ажал аргагүй сэнтэй. Дамжуулгануудыетнай ажаһуугшад хүлеэн байдаг. Үшөө олон жэлдэ харагшадаа баярлуулжа ябахыетнай хүсэнэб,- гэжэ тойрогой хүтэлбэрилэгшэ хэлэбэ.

Энэ үдэшэ ветеранууд, сэдхүүлшэд Гүрэнэй шангуудаар, Хүндэлэлэй грамотануудаар, Баярай бэшэгүүдээр урмашуулагдаа.  Агын тойрогой дэбисхэр дээрэ хүдэлжэ байгаа федеральна эмхинүүдэй, аймагуудай, нютагуудай захиргаануудай, хамтын ажахынуудай хүтэлбэрилэгшэд мүн лэ амаршалгын үгэнүүдые зорюулһан, бэлэгүүдые барюулһан байха юм. “Амар сайн” театрай зүжэгшэд баярай үдэшэ шэмэглээ.

Телевидениин байгуулагдаһаар 30 жэлэй ойн баяр  суг хамта хүдэлһэн нүхэдэй ёһотойл һайндэр болоо. Холын 1991 ондо тэдэниие нэгэ хэрэг,  нэгэ эрмэлзэл хамтаруулаа. Энэ сагай хугасаа соо хэды олон дамжуулганууд агаарай долгёор гарааб даа, хэды шэнээн ута замууд гаталагдааб, хэды олон һонин уулзалганууд болооб!

Мүнөөдэр Агын телевидени сагай эрилтэдэ таарама хэрэгсэлнүүдээр дүүрэн хангагданхай. Урагшаа һанаатай бэрхэ хүбүүд басагад тойрогойнгоо түүхэ арьбадхалсаһаар. Түрүүшын үдэрһөө  мүнөө болотор хүдэлжэ байһан мэргэжэлтэдтэ- видеокамерын, микрофоной, хурса гуурһанай ёһотойл “эзэдтэ”, аха нүхэдөө халан абаһан залуушуулда  амжалта хүсэе!