Уншагшадай уурхайда

ШЭНЭЛЭГДЭҺЭНЭЙ ХОЙНО

Совет үедэ Үндэһэтэнэй номой сан М. Горькиин нэрэмжэтэ байһан. Үнгэрһэн хабар номой санда дахинаа нэрэ олгуулха талаар олоной дунда һунгалта эмхидхэгдэһэн аад, олоной үүсхэлээр зогсоогдоо бэлэй. Тиимэһээ Үндэһэтэнэй номой сан гээд лэ ябаха болоо.

“Номой сангай гол байшанда шэб шэнэхэн залгалаа баригдаад нээгдээ бэлэй, харин мүнөөдэр хуушан байшаниинь шэнэлэгдээд, ашаглалда тушаагдаба. Тиигэжэ номой сан урданайхиһаа гурба дахин үргэн болоо, мүнөө үе сагай эрилтэ хангама һайхан таһалганууд байгуулагдаа.  Янза бүриин номой сангуудые хараһамби. Гэбэшье анха түрүүшынхиеэ иимэ библиотекэтэй танилсажа байнаб. Номуудые дураараа баряад шэнжэлмээр, олон зоной уулзажа харилсамаар”, -  гэжэ Алексей Цыденов тэмдэглээ.

Хоёр жэлэй саана нээгдэһэн шэнэ залгалаа соо хоморой болон үнэтэ номуудай таһаг, абонемент, соёл болон искусство тухай номуудай зал, литературна болон хүгжэмэй зал, оньһожоруулгын болон каталожно залнууд, компьютерна зал оршоно. Номой сангай орой дээрэ харалгын талмай тодхоотой.  Уншагшадай зал, библиографиин болон хизаар ороноо шэнжэлгын түб, эрэмдэг бэетэй зоной хандаха зал шэнэлэгдэһэн байшан дотор түбхинэбэ. Амаран харилсаха, мүн үхибүүдэй наадаха таһалгануудшье байна.

ХЭМЖЭЭ ЯБУУЛГЫН ҮЕДЭ

Энэ удаа Үндэһэтэнэй номой сан «Библионочь» гэжэ хэмжээ ябуулгаяа аяншалгада зорюулаа. 42 талмайхан бүридүүлэгдэжэ, янза бүриин мастер-классууд, нааданууд болон квестнүүд эмхидхэгдээ. Гурбадахи дабхарта үзэсхэлэн дэлгээгдээ. Юун үгыб даа! Магнитигууд, зурагууд, янза бүриин түхэлэй мылэ... Эдэ бүгэдые Буряадаймнай уран гартан урлан бүтээнэ. Энэ һайхан үзэсхэлэнгэй хажууда үндэһэн хубсаһанай харалга болоо. Гоо һайханай һалбарида нилээд нэрэтэй боложо ябаһан модельер Раджана Будаева бүтээлнүүдээ – буряад арадай үндэһэн хубсаһа олоной      урда харуулаа. Удаань квест-викторина эмхидхээ. Отог отогуудай онсо илгаа олохо даабари харагшадта үгтэһэн байгаа.   

Мэргэдүүдэй хэрэмдэ июлиин 29-30-ай үдэрнүүдтэ “Тоонто нютагайм баялиг” гэжэ үндэһэн хубсаһанай фестиваль Раджана Владимировна үнгэргэхэеэ бэлдэжэ байна. Тэрээндэ оролсохыень бултаниие урина. [email protected] гэһэн хаягаар, али 89025-65-18-53 утаһаар мэдүүлгэ июниин 29 болотор эльгээжэ болоно.   

«АРАДАЙ ХҮСЭЛ» 

Раджана Будаева хоёр жэлэй саана “Арадай хүсэл” гэжэ ниитэ эмхи байгуулһан юм. Тэрэ эмхиин бүридэлдэ мүнөө дээрээ 200-гаад гэшүүд тоологдоно.

“Эгээл эдэбхитэй 10 хүн дээрэ энэ эмхи тулгална гэхэдэ болоно. Бидэ заншалта хубсаһа дэлгэрүүлхын талаар ажал ябуулхаһаа гадуур соёлой болон аяншалгын түб байгуулха тухай хэмжээнүүдые эрхилнэбди. Дэлхэйн аяншадые угтан абаха үндэһэн түбтэй болоо һаа, юун һайн һэм даа”, - гээд, Раджана Владимировна дуулгана.