Захааминай аймагта ехэ бороон

Харин заха холын Захааминай аймагай Хамни болон Бүргэ нютагуудай хоорондо айхабтар ехэ аадар бороон орожо, харгынуудаар уһан урдажа,  тэдэниие ехэ гэгшын һубаг болгожорхибо. Аадарай үедэ зоной буулгаһан видео дээрэ ехэ уһанай урдажа байхаһаа гадна, мүндэр ороһон байна гэжэ элеэр харагдана. Холоһоо харахада, саһан ороод байна гэжэ һанахаар.

• Харгын нэгэ газарта ехээр уһан суглараад байна. Тэндэнь нүхэн болоо хаш даа, - гэжэ нютагай нэгэ хүн хэлэнэ.

Тарималнуудааа һайнаар хушаха хэрэгтэй гэжэ захиргаанай мэргэжэлтэд нютагаархидтаа  дуулгаа. Ехэ мүндэр оробол, һая бултайжа байһан ургамалнуудые хайра гамгүйгөөр сохижо һалгаха болоно ха юм.

Уларил шэнжэлэгшэдэй уридшалан үгэһэн мэдээгээр баруун-урда нютагуудаар аадар бороо орохоор багсаагдана. Байгал шадараар хүйтэн, бороотой уларил тогтохо юм ха.