Уласхоорондын хэмжээ ябуулга Буряадта

Эсэгэ ороноо хамгаалгын аймшагтай хорото дайнда 27 сая  хүн наhа бараа. Тиимэhээ энэл тоогоор гүрэн дотор 27 сая модон таригдаха ёhотой. Уласхоорондын хэмжээ ябуулга 2020 ондо эхилһэн байна. Россиин Юрэнхылэгшэ Владимир Путин Ржев хотын дурасхаалай хүшөөгэй хажууда модо тарижа, энэ хэмжээ ябуулга дэмжэхые уряалһан юм. Хоёр жэлэй туршада Россиин 85 можо хизаарһаа 2 сая хүн "Дурасхаалай сэсэрлигтэ" хабаадалсаа. Дүтын болон холын хари гүрэнүүдшье  энэ ябуулга дэмжээ. Мүнөө “Дурасхаалай сэсэрлиг гэртээ”, “Дурасхаалай сэсэрлиг үхибүүдэй нюдөөр” гэһэн ябуулганууд эхилээ. Жэл бүри 5 мянган үхибүүдэй зурагууд эльгээгдэнэ. Байгша ондо хабаадагшадай тоо нилээд ехэ болоо. Москва хамгаалгын 80 жэлэй ойдо, Сталинградска, Кавказай түлөө байлдаануудта зорюулагдажа,  модохонууд таригдана. Саашадаа ганса һурагшадые бэшэ, харин сэрэгтэ алба хаагшадые болон оюутадые энэ хэрэгтэ хабаадуулха юм.

Энэ ехэ үйлэ хэрэгтэ Улаан-Үдэ хотын 51-дэхи hургуули дүүргэжэ ябаhан хүбүүд басагад эдэбхитэй оролсоһон  байна. Тэдэ  хүгшэн аба эжынэрэйнгээ  дайшалхы зам, баатаршалга тухай һайн мэдэхэ юм. Дайнда ами наhаяа гамнангүй, аймшагтай байлдаануудта эрэлхэг зоригтойгоор фашис дайсадтай тулалдажа, нэрэеэ нэгэшье алдангүй, дэлхэйдэ эб найрамдал асарhан баатарнуудаар һурагшад омогорходог.

 

Һургуулияа түгэсхэжэ, наһанайнгаа үргэн харгыда гарахаяа байһан хүбүүд басагадай алинииньшье модохонуудые мүнөө hуулгажа байхадаа,  элинсэгүүдэйнгээ нэрэнүүдые бүришье һаа ехээр hанан дурсан ябана.  Залуу һүрэг хэзээдэшье хүгшэн аба эжынэрээ мартахагүй, тэдэнэй баатаршалга тухай үхибүүдтээ хөөрэхэ, дамжуулха гэжэ найдамаар. Тиихэдээл сагай холбоо хэзээдэшье таhархагүй жэшээтэй.

 

“Мүнөө сагта түүхэеэ мэдэхэ тон шухала, илангаяа Эсэгэ ороноо хамгаалгын дайн тухай. Агууехэ Илалтын түлөө хэды олон хүн ами наһаяа үгөөб даа.  Мүнөө модо  тарижа байһан үхибүүд саашадаа түрэл һургуулидаа айлшалан ерэхэдээ, тариһан модонуудаа хаража баярлаха, элинсэг аба эжынэрээ һанаандаа оруулха, тиимэһээ түүхэ мартагдахагүй. Россиин арадуудай ажабайдалда тохёолдоһон  шуһата хуудаһан дабтагдахагүй гэһэн найдалтайгаар "Дурасхаалай сэсэрлиг"  эмхидхэгдэнэ”, - гээд, Улаан-Үдэ хотын Һунгамалнуудай зүблэлэй түрүүлэгшэ Чимит Бальжинимаев хэлэнэ һэн.

Энэл газарта hургуулиин захирал байhан, дайнда ябаhан сэрэгшэ Алексей Каширихиндэ зорюулагдаhан модон таригдаһан юм.  

Энэ хэрэгтэ Уласай эколого-биологическа түб хам оролсожо, модохонуудые тарилсаа.

Нёдондо бүхыдөө тус ябуулгада 16 мянга гаран hурагшад, мүнөө жэл 20 мянган үхибүүд хабаадалсаhан байна.

Сагаан сэсэгтэй бургааhан, альма модон, улаалзаргана, нарhан... Энэ хадаа амиды хүшөөнүүдэй сэсэрлиг гээшэ. Бүхыдөө улас дотор мүнөө жэл 3 мянга гаран ургамал тариха түсэбтэй.

1941-1945 онуудта дэлхэй дээрэ 70 сая  хүн наhа бараhан байна.  Тиихэдээ 70 сая модо hуулгажа, сэрэгшэдэй дурасхаалые мүнхэлхэ зорилготой.