380
Эдэ үдэрнүүдтэ Захааминай аймаг үргэн дэлисэтэйгээр, һүр жабхалантайгаар Сурхарбаанаа үнгэргэбэ. Иигэжэ захааминайхид аймагайнгаа 95 жэлэй ойн баяр тэмдэглээ.
Захаамин хото шадархи ойн соорхойдо зохидхон оршон байдалда үнгэрһэн һайндэртэ 8 мянга гаран хүн хабаадаа. Бүхэ барилдаа, мори урилдаа, һур харбалга, шатар болон спортын бусадшье зүйлнүүдээр мүрысөөнүүд үдэшэ орой болотор үнгэргэгдөө, соёлой хэмжээ ябуулгануудшье эмхидхэгдээ. Юрэдөө, сугларагшад ехэл урмашаа, сэдьхэлээ баясуулжа тараа.
Һайндэрэй хүндэтэ айлшадай тоодо Буряадай Толгойлогшо Алексей Цыденов байлсажа, Захааминай аймагта аяншалга хүгжөөлгын арга боломжонуудтай танилсаа. Тиигэжэ һаяын сагта тус аймаг Буряадай аяншалгын шухала түбүүдэй нэгэн болохо ёһотой гээд, һайндэр эмхидхэгшэд тоолоно.
Захааминай дархашуул холо ойгуур суутай юм. Тиигэжэ тэдэнэй уран гараар бүтээгдэһэн дурасхаалай бэлэгүүд сугларагшадай һонорто дурадхагдаа. Мүн эдеэ хоол буйлуулжа наймаалһан газарнуудшье аяншалагшадые гайхуулха аргатайгаа гэршэлээ.
Фото: Буряад Уласай Засагай газарай хэблэлэй албан
