Хамтын түсэл

Буряад Уласай Үндэһэтэнэй музей экскурсинуудые, уран зураашадтай, урашуултай уулзалгануудые Лев Бардамовай галерейдэ  үнгэргэнэ. Гадна тусхай зорилготой үдэшэнүүдые мэдээжэ артистнуудай, уран зохёолшодой, уран зураашадай, хүгжэмшэдэй хабаадалгатайгаар  үнгэргэхөөр түсэблэгдэнэ.

Галерейн  18 танхим соо Буряад ороной элдэб үе сагай түүхэтэй холбоотой 48 мянган үзэсхэлэн дэлгээгдэнхэй. Тиихэдэ буряад уран зураашадай  5 мянга гаран зураг бии, мүн тон хоморой номуудтай номой сан нээгдэһэн юм. Лев Бардамовай музей уласай түрүүшын  хубиин музейнүүдэй нэгэн юм. Мүнөө үшөө олон  ажаһуугшад ба айлшад хубиин суглуулбаритай танилсаха аргатай болобо.

- Та уласай үнэн бодото патриот болонот. Иимэ суглуулбари республика соо дүтэ наашашье үгы. Эртэ урдын сагһаа мүнөө хүрэтэр манай ороной тон һонирхолтой “түүхын түгдэрхэйнүүдые”  суглуулаат. Юрэдөөл, энээндэ ганса та өөрын мүнгэ зөөриһөө гадна,  зүрхэ сэдьхэлээ, хүсэ шадалаа, сагаа гамнангүй шэглүүлээт.  Эдэ бүгэдые суглуулха, тааруулжа табиха, хадагалан сахиха, хаража, заһажа байха гээшэ ехэ ажал ха юм. Танай зүбшөөлөөр бидэ уласай ажаһуугшадые, айлшадые  үшөө олоор ябуулхабди. Үндэһэтэнэй музейн дэмжэлгээр экскурсоводууд олошорхо, тиигэжэ ерэгшэдые үшөө олоор оруулха аргатай болохот. Та Эхэ орондоо үнэн сэхэ дурлалай жэшээ болонот. Москвада  Третьяковой Үзэсхэлэн бии, харин манда - Бардамовай, - гэжэ Алексей Цыденов тэмдэглээ. 

Мүнөөдэр Лев Бардамовай музей «Россиин арадуудай болон үмсын музейнүүдэй ассоциаци» гэһэн каталогто оруулагданхай. Үзэсхэлэнэй хүдэлжэ байһан хугасаада Россиин  хотонуудай мэдээжэ хүнүүд, олон тоото аяншад, залуушуул ба һурагшад орожо хараа, олон юумэ ойлгожо абаа. 

- Алексей Самбуевич эгээл түрүүшүүлэй зэргэдэ энэ түлэбтэ анхаралаа хандуулаа гэжэ хэлэхэдэ болохо, тэрэнэйнь түлөө би ехэ баяр хүргэнэб. Тиигэжэ саашадаашье харилсахаар бэлэмби. Бидэ хотынгоо, уласайнгаа, түрэл дайдынгаа һалбархын түлөө үшөө ехэ юумэ хэхэбди гэжэ  этигэнэб. Манай түүхэ баян, арад зон баян, тиигээдшье газар уһамнайшье баян, - гэжэ галерист, коллекционер Лев Бардамов баяраа мэдүүлээ.