Омоли загаһа олошоруулна

-Байгалай омоли загаһа олошоруулха зорилготой  ажалай дүн харагдажа байна. Энэ  ушараар загаһашадта хахуулидажа бариха арга олгогдохонь. Ерэхэ жэлһээ үсөөн тоото арадуудай түлөөлэгшэдтэ үйлэдбэрилхын түлөө бариха эрхэ олгогдохо бэзэ гэжэ найданабди. Үгы болохо тооной загаһа һөөргэнь бии болгохо гэжэ хэһэн ажалайнгаа дүршэлтэй Кыргызстан гүрэнтэй хубаалдаха болобобди, - гэжэ “Росрыболовство” эмхиин захирал Илья Шестаков хэлэбэ.

Гансал Байгал далайда амидардаг омоли загаһанай  үсөөн болоһон ушарһаа тэрэниие олзоборилхонь 2017 оной октябриин 1-һээ хуулиин ёһоор хоригдоһон юм. Мүнөө тэрэниие барибал, загаһашад хуулиин ёһоор хэһээгдэжэ,  ялада унаха зэргэтэй. Хэды тиигэбэшье үе-үе болоод лэ,  эндэ-тэндэ омоли загаһа бариһан эрхэтэд баригдаба гэһэн мэдээнүүд үгтэдэг. Эрдэни зэндэмэни болохо Байгал далайда гансал амидардаг омоли загаһаяа алдаха ёһогүйбди.