Хэрмэн һүлдэ тэмдэгтэй

 -Эртэ урдын сагһаа хойшо уран дархашуул ехэ хүндэтэй зон байһан ха юм даа. Үшөө Чингис хаанай сагһаа тэдэ зомнай үндэр дээрэ үргэгдэжэ, арадайнгаа дунда дархан гүүлэжэ, хүндэтэй ябадаг һэн. Энэ фестивалиин гол зорилго хадаа - уран дархашуулые дээшэнь үргэхэ, энэ зүйл хүгжөөхэ, соёл урлалда тусхай кластер байгуулха. Энэ жэлһээ хойшо фестиваль заншалта болохо, хэрмэн ехэ танигдадаг болохо ёһотой. Теэд хэрмэндээ нэрэ үгэхэ ёһотойбди, фестивалиин үедэ дуугаа үгэжэ нэрлэхэбди гээд, “Байкал” гэһэн коммерческэ бэшэ эмхиин захирал Татьяна Швыдченко хэлэбэ.

Түрүүшын үдэрынь - июниин 17-до эрдэмэй-практическа хуралдаан үнгэрхэ. Харин үглөөдэрынь уран дархашуул өөрын хэһэн бүтээлнүүдээ олоной һонорто дэлгээжэ харуулха. Эрхүү буряадуудай ансамбльнууд урданай дуунуудые хангюурдаха юм. Тэрэ үдэр ерэһэн айлшад дархашуулай бүтээлнүүдые худалдан абаха азатай байха. Тус фестиваль Россиин Юрэнхылэгшын Грант шүүһэнэй ашаар бэелүүлэгдэхэ аргатай болоһон байна гээд, Орда инфо мэдээсэнэ.