681
Тарбагатайн аймагай захиргаанай мэдээсэһээр, зун болохотой сасуу зон олоороо иишээ ерэжэ мүргэдэг юм. Тиигэжэ Буряад ороной ажаһуугшадһаа гадна, хари гүрэнһөөшье аяншалагшад зорижо ерэдэг ха.
Бүхэ Баатар гэжэ арад зоной дунда нэршэһэн шулуун хабсагай Арсалан хадын (гора Омулёвая) хажууда байдаг юм. Һуужа байһан эрэ хүнэй дүрсэтэй энэ хабсагай Байгал далай тээшэ, тодорхойлходо, бөө мүргэлэй түб гэгдэдэг Ойхон олтирог руу харадагынь онсо удха шанартай.
Теэд энэ газарта Бүхэ Баатар гансаараа һууна бэшэ, ара нюргандань һамганиинь ба басаганиинь байдаг юм. Адаглажа хараа һаа, Бүхэ Баатар баруун гартаа аяга, зүүн гартаа бөөгэй хэсэ баряад байдаг.
Жэл бүри энэ хабсагайн хажууда бөөгэй тайлганууд болодог. Тэрээндэ гансал бүһэтэй бөөнэр хабаададаг, харин удаганууд оролсоошье һаа, миин лэ туһамаршан болодог юм.
Бүхэ Баатар бэеын шадал тэнхээ, сэдьхэлэй эршэ хүсэ үршөөнэ гэжэ һүзэгшэд тоолодог. Тиимэһээ сэрэгшэд, тамиршад, дотоодын хэрэгүүдэй албанай хүдэлмэрилэгшэд илангаяа олоороо ерэжэ мүргэдэг. Сэлэнгэ мүрэнэй эзэн гэжэ тоологдодог Бүхэ Баатарта уласаймнай түрүү эхэнэр барилдаашад жэл бүри зальбардаг заншалтай.
Фото: Василий Тараруев, UlanMedia
