Түрэл хотын түрэһэн үдэр

Улаан-Үдын түб талмай дээрэ үнгэргэгдэһэн баярай хэмжээ ябуулгануудһаа гадна, хотын аймаг бүхэндэ олоной хабаадалгатай хэмжээнүүд эмхидхэгдээ.

-Түрэл хотомнай аяар 356 жэлэй саада тээ байгуулагдаа. Манай хотодо ажаһуудаг арад зон эбтэй нэгэ гэр бүлын гэшүүд болоно. Улаан-Үдэдэ түрэһэн, олон жэлдэ ажаһуужа байһан, эндэ һуража байһан залуушуулай, хүдэлжэ байһан эрхэтэдэй бултанайнь һайндэр гээшэ. Жэлһээ жэлдэ түрэл хотомнай болбосон түхэлтэй боложо, һайжаржал байна. Та бүгэдэнөө, илангаяа хүндэтэй ветерануудаа үшөө дахин хани халуунаар амаршалнаб! – гэжэ мэр Игорь Шутенков үгэ абахадаа хэлэбэ. 

Энэ үдэр ажаһуугшад, айлшад хотын түрэһэн үдэрөөр бэе бэеэ халуунаар амаршалаа. Ёһотой һайндэрэй оршон байдал тохёолдоо даа.

-Бүхы Буряад оромнай Улаан-Үдэ хотодоо адли дабтагдашагүй һайхан даа. Ямар гоё, хүдэр шамбай хүнүүд жагсаалда хабаадааб,  булта харабат. Түрэл хотомнай, Буряад Уласнай үдэр бүри хүгжэг, һалбараг! Улаан-Үдэ,  түрэһэн үдэрөөр! – гэжэ Буряад Уласай Толгойлогшо Алексей Самбуевич Цыденов сугларһан зониие халуунаар амаршалба.

Үнинэйшье Улаан-Үдымнай гол талмай дээрэ иимэ олон зоной хабаадалгатайгаар хотын түрэһэн үдэр тэмдэглэгдээгүй даа. Бүхы юумэнэй хорюултай байһан ушарһаа  хэдэн жэлэй туршада үргэн дэлисэтэйгээр найр наада үнгэргэжэ шадахагүй байгаабди. Одоошье мүнөө хотын ажаһуугшад болон айлшад бултаараа сугларжа, ёһотойл баярай үдэр болобо гээшэ. Эгээл олон зоной хабаадалгатай хэмжээ ябуулга хотын түб талмай дээрэ заншалта ёһоороо үнгэрһэниинь гайхалгүй.

Гол талмай дээгүүр...

Жагсаалда хабаадажа ябаһан зониие гоё һайханаар шэмэглэгдэһэн авто-унаа ударидажа,  хойноо 10 гаран мянган зониие дахуулаа. Буряад Уласай Ветерануудай зүблэлэй түлөөлэгшэд, удаань хотын зүблэлэй,  мүн тиихэдэ олониитын эмхинүүдэй гэшүүд хотын ажаһуугшадай урдахануур алхалан гараба. Тэдэнэй удаа манай  урдаа хараха сагаан хубсаһатай эмшэд Буряад Уласай элүүрые хамгаалгын сайдай ударидалга доро жагсаба. Улаан-Үдэ хотодо ажалладаг эмхи зургаануудай түлөөлэгшэд, ажалшад улаа-ягаан хубсаһа үмдэжэ, уряагай үгэнүүдые хэлэжэ,  олоной урдуур алхалаа. Юрэдөө, үбгэн буурал болоһон аха захатан, эдир жаахан хүүгэд, тамиршад, эмшэд, багшанар, оюутад, залуушуул, томо-томо үйлэдбэриин ажалшад эндэ нэгэдэжэ,  Улаан-Үдэ хотынгоо түрэһэн үдэртэ баяртайнууд хүрэжэ ерээ. Һүр жабхаланта хүгжэмэй доро үнгэрһэн жагсаалай замхахада, нээлгын баяр ёһололой хэһэг эхилбэ.

Хүндэтэй ажаһуугшад

Хотын мэр Игорь Шутенков ажаһуугшадые халуунаар амаршалаа.

Удаань Улаан-Үдын хүгжэлтэдэ али болохоор туһа үзүүлһэн, өөрынгөө габьяа оруулһан эдэбхи ехэтэй эрхэтэд Баярай бэшэгүүдээр урмашуулагдаа, шагнагдаа. Ургажа ябаа залуушуулые  Эхэ орондоо дуратайгаар хүмүүжүүлхэ хэрэгтэ амаргүй ехэ хубитаяа оруулһан  36-дахи Армиин ахалагша Валерий Солодчугта «Улаан-Үдын хүндэтэ эрхэтэн» гэһэн нэрэ зэргэ олгогдобо. Иимэ хүндэтэй нэрэ зэргэ  жэлэй нэгэ дахин нэгэ хүндэ олгогдодог юм.

- Улаан-Үдэдэмнай гансашье Ород Улас дотороо бэшэ, харин холын гадаада оронуудаар  өөрынгөө бүтээлнүүдээр суурхадаг авиационно завод хүдэлнэ. Мүн лэ улас дотороо тон ехэ вагон заһабарилгын завод олон жэлэй туршада ажалладагынь мэдээжэ. Алас Дурна болон Зүүн Сибириин тойрогто эгээл ехэ Улан-Удэстальмост, мяха үйлэдбэрилдэг эгээл томо Бурятмяспром, – гэжэ Буряад Уласай Толгойлогшо Алексей Самбуевич Цыденов сугларһан зониие халуунаар амаршалба.

Дуутай шуутай һайндэр

Түүхэ ехэтэй түб хотынгоо түрэһэн үдэртэ дууша, хатарша хүүгэдэй бүлгэмүүдһээ эхилээд, дүршэл ехэтэй, талаан бэлигтэй зүжэгшэд болон дуушад нютагаархидайнгаа шэхэнэй шэмэг, нюдэнэй хужар болобо. Эгээл ехээр хүлеэгдэһэн айлшан гэхэдэ, Хабиб дуушан байгаа. Мэдээжэ дуушаниие урижа асарһан зондо ажаһуугшад баяраа мэдүүлээ.

-Үнинэй хүлеэгдэһэн һайндэр, хүүгэднай ехэ баяртайнууд. Һайндэрөөр бүхы арад түмэнөө амаршалнаб! – гэжэ хотын нэгэ ажаһуугша хэлэнэ.

Тиихэдэ ямаршье юумэндэ һайн, муу тала байдаг даа. Энэшье удаа гомдол барижа, өөрынгөө һанамжа Интернедтэ бэшэһэниие уншабаб.

-Энэ ехэ һайндэр үнгэргөө хадаа арад зоной тала барижа,  түб стадион дээрэ үнгэргэхэ байгаа.

-Урдуур байһан зондо гансал һайнаар харагдаа, дуулдаа. Харин холуур байһан хүнүүдтэ  харагдахаһаа байтагай юушье дуулдаагүй. 

-Хүнэй хармаан нэгжэдэг зондо одоол гоё үдэр болоо, - гэхэ мэтэ удхатай гомдолнууд сүлжээ холбоондо аржыса бэшээтэй даа.

Улаан-Үдын 356-дахи түрэһэн үдэр үнгэ бүреэр һалбарһан салюдаар түгэсэбэ.