Буряадай хүдөө һуурингай һургуули түгэсхэһэн хүбүүн тухай хөөрөөн түбэй телеканалаар гараа

Эрдэм Эрхеев тухай хөөрөөн «22 оной выпуск: Илалтануудай марафон» гэһэн гурбан сагай фильмдэ оруулагдаа. Бусад можо нютагуудай һурагшадтай хамта тэрэ гүрэнэй удха шанартай арга хэмжээндэ хабаадаба ха юм. Дунда һургуули түгэсхэһэн тухай үнэмшэлгэнүүдые барюулгада зорюулагдаһан бүхэроссиин баяр ёһололой хүтэлэгшэдэй тэмдэглэһээр, Эрдэм элдэб юумээр һонирходогшье һаа, программист болохо хүсэлтэй.  

Хоёр минутын туршада тэрэ түрэһэн нютаг тухайгаа хөөрөө, мүн ЕГЭ-дэ бэлдэһэн тухайгаашье хэлэжэ үрдеэ. 2022 ондо Мэлэ нютагай һургуули оройдоол 4 хүн, тэрэ тоодо Эрдэм Эрхеев дүүргэжэ гараа.  

- Би өөрынгөө һургуулида дуратайб, багшанарнай бэрхэнүүд. Тоо бодолгын ба информатикын хэшээлнүүдтэ дуратайб. Тиимэһээ программистын мэргэжэлэ һураха һанаатайб, - гэжэ Эрдэм хөөрэнэ.   

Эрдэм - үнэр үдхэн гэр бүлын гэшүүн, аба эжынь дүрбэн үхибүүдые хүмүүжүүлнэ. Эжынь – багша, абань – олзын хэрэг эрхилэгшэ. Үмсэдөө яһала олон мал харадаг, Эрдэм тэдэниие ажаллалсахаһаа гадна, техникэ заһаха дуратай.  

- Хүбүүд заатагүй мори унажа шадаха ёһотой гэжэ тоологшоб. Хүдөөдэ адуугүй байхын аргагүйл даа, - гэжэ һурагша тэмдэглэнэ.

Эрдэм үглөөнэй 6 сагта бодожо, үхэр малаа бэлшээридэ гаргадаг. Удаань гахайнуудаа эдеэлүүлдэг, үнеэдээ һаалсадаг. Оросой бусад хүдөө һуурингуудай һургуули дүүргэһэн хүбүүд басагадта үреэл хэлэхэдээ, хүсэһэн газартаа орожо һураад, нютагаа бусажа, хүгжэлтынь түлөө шармайхыень Эрдэм захина.