Эршэмтэй хүгжэлтэ туйлана

 2022 ондо Яруунын аймагай байгуулагдаһаар  95 жэл гүйсэбэ. Ойн баярта зорюулагдаһан баяр ёһололой хэмжээ ябуулгануудта тэрэ хабаадаа,

хүдөөгэй 14 нютагай туйлалтануудтай танилсаа.

- Яруунын аймаг эгээл һайн ерээдүйтэй аймаг байна. Юундэб гэхэдэ, мүнөө эндэ  ехэ түлэбүүд бэелүүлэгдэнэ. Эгэтын ГОК ажалаа эхилээ, “Озёрный” ГОК-то мүнөө жэл ехэ  барилга түгэсэхэ. ГОК – ганса республикымнай ехэ  инвестиционно түлэб бэшэ, Росси гүрэн дотор эгээл ехэ түлэбүүдэй тоодо ороно. Аймагта һургуули баригдана, бэшэ һургуулинуудые һэльбэн шэнэлнэбди, хүүгэдэй сэсэрлиг, соёлой  объектнүүдые баряабди. Аймагай харгынуудааршье мүн баһа байдал һайжарха. Эдэ объектнүүдтэ аймагай зон хүдэлхэ ёһотой, – гэжэ Алексей Цыденов аймагай ажаһуугшадые амаршалхадаа хэлэбэ.  

Яруунын аймаг эзэлдэг газар дайдаараа республикын эгээл ехэ аймагуудай нэгэн юм. Ашагта малтамалнуудаар, байгаалиин үзэсхэлэнгүүдээр  тон баян. Тэрээнһээ гадуур, Яруунын аймаг мүнөөдэр эршэтэйгээр хүгжэжэ байһан аймаг. Һүүлэй жэлнүүдтэ хүдөөгэй  соёлой 4 байшан ашаглалгада тушаагдаа. Федеральна Киногой жасын дэмжэлгээр Нарһатада  кинотеатр нээгдэнхэй. Үндэһэн "Демографи" түлэбөөр тэндэл 150 һууритай хүүгэдэй сэсэрлиг баригдаа. Аймагай  нютагуудта 2 ФАП, 3 врачебнэ амбулаторинууд үүдэеэ сэлеэ. Нарһатада хирургическа ба түрэлгын таһагууд һэльбэн шэнэлэгдээ. Ниигэмэй  объектнүүд сооһоо хэлэбэл, Тэлэмбэдэ барилдаанай найман ханатай гэрые муниципальна хубиин нэгэдэмэл хүсөөр баряа.  

- Эдээнһээ гадуур, Яруунын аймаг экономикыншье талаар байра дээрээ тогтошоогүй. Тиин үнгэрһэн жэлэй туршада промышленна үйлэдбэриин хэмжээн  570 сая түхэригһөө 1,142 млрд түхэригтэ хүрөө. Иимэ үрэ дүн инвестиционно түлэбүүдые бэелүүлһэнэй ашаар туйлагдаа. Аймагай мэдэлэй газар дайдада хүрэнгэ шэглүүлгын 39 түлэб үйлэдбэридэ, хүдөө ажахыда, олзын хэрэг эрхилэлгэдэ бэелүүлэгдэнэ. Эдэ бүгэдэ һайн дүнгүүд Буряад Уласай Толгойлогшо Алексей Самбуевич Цыденовэй, Буряад Уласай Засагай газарай болон Арадай Хуралай һунгамалнуудай дэмжэлгээр туйлагдаа, - гэжэ Яруунын аймагай засаг дарга Чингис Цыренжапов тэмдэглээ. 

Яруунын аймагай арад зониие  ойн баяраар амаршалхаяа эндэһээ гарбалтай зон, артистнууд ба олониитын ажал ябуулагшад, республикын аймагуудай болон Россиин можо хизаарнуудай түлөөлэгшэд хүрэжэ ерээ. 

- Би өөрынгөө түрэл дайдада улам саашаа һалбаран  хүгжэхыень, энэ газар дээрэ хүнүүдэй аза жаргалтай үни удаан ажаһуухыень,  тэдэнэй ходол амжалта туйлахыень хүсэнэб, - гэжэ нютагайнгаа зониие Буряадай соёлой габьяата хүдэлмэрилэгшэ, Яруунаһаа гарбалтай Ринчин-Доржо Санданов амаршалаа.

Баярай хэмжээ ябуулганууд стадион дээрэ үргэлжэлөө. Тэндэ аймагай 14 нютаг һуудал байдалаа дэлгээ. Нютаг бүхэн заншалта эдеэ хоолоо болон байра байдалаа доторһоонь харуулаа.

- Манай аймаг  сэнхир хүхэ нуурнуудтай, үзэсхэлэн гоё байгаалитай, энхэргэн улад зонтой. Түрэл дайдадаа би дуратайб. Тиигээд лэ улам саашаа хүгжэн һалбаржа байхыень хүсэнэб, - гэжэ Яруунын аймагай ажаһуугша Алёна Колмакова нютагаархидаа амаршалаа.

Июниин 25-да баярай хэмжээ ябуулганууд үргэлжэлжэ,  айлшадые арадай найр наадан - Сурхарбаан угтажа абаа.