Һэргэг байха хэрэгтэй

Хоёр ехэ голой уулзуур дээрэ оршоһон хотын ажаһуугшадта тааруу зохид, бүхы эрилтэнүүдые дүүргэһэн пляж гэжэ оройдоо байхагүй. Тиигэхэдэнь яаха аргагүй хүн зон өөһэдын шэлэһэн газарта уһанда орохо баатай болоно. Улаан-Үдын матросууд-абарагшад эдэ үдэрнүүдтэ сүлөө тухагүй ажалаа ябуулна. Ехэшүүлэй талаһаа анхаралгүй, өөһэдөө уһанда орожо байһан хүүгэдтэ ойлгууламжын ажал ябуулна.

• Улаан-Үдын ажаһуугшадта Комсомольский олтирог дээрэ Протока горхондо уһанда орохо арга олгогдонхой. Теэд тэрэнь холо, түбһэн хүн тиишээ хүрэхэгүй, олон зонииешье багтаахагүй. Тиихэдэнь хүн зон аймшагтайшье һаань, Сэлэнгэ, Үдэ голнуудта умбана ха юм, - гэжэ хотын ажаһуугша нэрээ нюугаад хөөрэнэ.

Зунай эхинһээ 3 хүн уһанда орожо байтараа шэнгээ, 2 хүн талаан тудажа абарагдаа. Июниин 27-до Байгал шадарай аймагта загаһа үсхэбэрилдэг ажахын бассейн дотор 13-тай басаган наһа бараа. Тэрэ ажахын бассейндэ орохонь огто хорюултай.

• Үдэрэй хэды дахин онгосоор ябажа, уһанда орожо байһан зониие эрьенэбди, ойлгууламжын ажал ябуулнабди. Абарагшадай 3 бүлэг мүнөө ажаллана. Ехэнхи ушарта архи уугаад, уһанда ороһон зон шэнгэнэ, - гэжэ Улаан-Үдын захиргаанай аюулгүй байдалай талаар хүтэлбэриин дарга Дмитрий Фёдоров хэлэнэ.

Уһанда болгоомжотойгоор шунгаха хэрэгтэй. Хүндэтэ гэртэхин, үхибүүдээ анхаралгүйгөөр уһанда бү оруулагты!