Ниитын унаа олошорхо

Байгша ондо Буряадай ниислэл Улаан-Үдэ хото руу 120 шэнэ автобусуудые асархаар засаг баригшад түсэблэнэ. Түрүүшын  ниитын 11 унаанууд август һарын дүүрэтэр ерэхэдээ магадгүй. Ниитын тээбэринүүд ерэбэшье, түмэр хүлэгүүдые ябуулха жолоошод дуталдана.

-Ниитын унаагай талаар нилээд ехэ бэрхэшээлнүүд бии гэжэ сэхэ хэлэнэбди. Энээн тушаа яһала олон хандалгануудые ажаһуугшад бэшэһэн байна. Гансашье унаагай талаар бэшэ,  харин жолоошодой талаар бэрхэшээлнүүд тудана, - гэжэ ниитын сүлжээндэ Буряад Уласай Толгойлогшо Алексей Цыденов бэшээд, үшөө иигэжэ нэмэнэ:- Олон автобус худалдажа абахадамнай МУП “Городские маршруты” гэһэн эмхиин гаргашань дээшэлхэ зэргэтэй. Тиимэ ушарһаа Буряад Уласай һанһаа 50 сая түхэриг тиишэнь шэглүүлхэбди.

Хотын захиргаан шэнэ- шэнэ шэглэлнүүдые зохёоно. Зарим ушарта дабхарлаһан, бэе бэедээ һаад ушаруулһан маршрудуудые һэлгэхэ, хоёр тээшэнь болгохо һэдэлгэтэй.   

Владимир хотын автозаводто  шэнэ автобусуудые суглуулжа эхилэнхэй. Автобус  28 һууритай байха, бүхыдөө 111 хүниие багтааха аргатай юм. Манай уларилда тааруулжа, үбэлдөө дулаан, зундаа һэрюун байхаар зохёогдоно. Үшөө тиихэдэ ямар буудал урдатнай хүлеэжэ байнаб гэжэ ходо соносхожо ябаха түхеэрэлгэтэй, гар утаһануудай хүдэлхэ болзор утадхаха USB-poзeткэнүүд байха. Одоошье иигээд Улаан-Үдымнай ажаһуугшад  хүйтэндэ даарахаяа, халуунда “хайлахаяа” болихонь гээшэ гү?