Хүдөө руу зүдхэнэ

- 2020 онһоо хойшо “Хүдөөгэй багша” гэһэн түсэлөөр хүдэлнэбди. Хоёр жэлэй хугасаада 57 хүн шэнэ газарта хүдэлжэ эхилээ. Мүнөө жэлдэ холын хүдөө һургуулида хүдэлхэ һанаатай 112 хүн мэдүүлгэ оруулһан байна. Шэлэн абалгын шатын удаа оройдоол 24 багшатай ажалай хэлсээ баталаабди, - гэжэ Буряад Уласай болбосоролой болон эрдэм ухаанай сайдай уялгануудые дүүргэгшэ Валерий Поздняков хэлэнэ.

“Хүдөөгэй багша” гэһэн түсэлдэ бүхы аймагууд хабаадуулагдана гээд хэлэхэ хэрэгтэй. Нэн түрүүн хэды багша, ямар шэглэлээр дуталданаб гэжэ аймагууд мэдээсэл оруулна. Энээн дээрэ үндэһэлэн, хэрэгтэй багшанарай бүридэл хэгдэнэ. Теэд өөһэдөө аймагууд шэнэ багшые хүлеэжэ, гэр байраар, түлеэ залһаар хангаха байһанаа гэршэлнэ. 2022 ондо Захааминай аймагай Холтосон, Ехэ-Сахир һууринуудта тоо бодолгын багша ошобо. Заха холын Захааминда гурбадахи жэлээ удаа дараалан хоёр-хоёр багша дуратайгаар ошоно гэһэн һайн жэшээтэй. Мухар-Шэбэрэй аймагай Суулгын һургуулиин багшанарай коллективтэ  тоо бодолгын багша ерээ. Алташын-Адагта оршодог тусхай интернат-һургуулида ород хэлэнэй ба литературын шэнэ багша хүдэлжэ эхилхэнь.

Һонирхолтой гэхэдэ, Баунтын аймагай Багдаринай  дунда һургуулида ород хэлэнэй ба литературын багша хэрэгтэй болошоо. Юуб гэхэдэ, 2020 онһоо хойшо тэндэ “хүдөөгэй багша” ород хэлэ эрхимээр заажа байдаг.

Бүхы дээрээ аймагууд руу тоо бодолгын 6 багша, хари хэлэнэй 5 мэргэжэлтэн ошобо гээшэ. Физикын, информатикын, ород хэлэнэй ба литературын, химиин, биологиин, түүхын багшанар хүдэлжэ эхилхэнь.

Ганса Улаан-Үдэдэ хүдэлжэ байһан мэргэжэлтэд хүдөө нютаг ошоно бэшэ, мүн бусадшье можо хизаарнуудай багшанар Буряад орон ерэхэ тухай шиидхэбэри абана.

“Хүдөөгэй багша” гэһэн түсэл Буряадта 2024 он болотор бэелүүлэгдэнэ.