Ерээдүйтэй үйлэдбэри

- Ямаршье үйлэдбэри нээгдэхэдээ – энэ хододоо баяр. Шэнэ үйлэдбэри, ажалай шэнэ һууринууд, шэнэ зүйлнүүд. Эндэ одоол амтатайгаар анхилна даа. Үйлэдбэри гүрэнэй дэмжэлгын хэмжээнүүдээр хүдэлжэ эхилбэ. Үйлэдбэриин хэмжээнүүд тон ехэ, ушар иимэһээ хилээмэнэй  зүйлнүүдые хүршэ можонуудта, Монгол орондо худалдаха аргатай. Харин гадаада руу гаргахадань, дэмжэхэ аргануудые байгуулхые оролдохобди. Үйлэдбэри ехэ ерээдүйтэй гэжэ би һананаб, - гэжэ Буряадай Толгойлогшо Алексей Цыденов тэмдэглээ.

Шэнэ завод нэгэ хоногто 30 тонноһоо үлүү хилээмэнэй зүйлнүүдые  үйлэдбэрилхэ шадалтай юм. Хүрэнгэ шэглүүлэлгын түлэб Буряадай Засагай газарай, Буряадай Хүдөө ажахын ба эдеэ хоолой, Үйлэдбэриин, худалдаа наймаанай ба хүрэнгэ шэглүүлэлгын яамануудай дэмжэлгээр бэелүүлэгдээ.

- Хүрэнгэ шэглүүлэлгын түлэб гурбан жэл соо үргэлжэлөө. Гол түхеэрэлгэнүүднай манай орондо бүтээгдэһэн байна. Энэ түлэб Буряадай Засагай газарай дэмжэлгэгүйгөөр бүтэхэгүй байгаал даа. Манда субсидированнэ мүнгэн зөөри  ВТБ банк урьһалжа, горитой хубитаяа оруулаа, - гэжэ «Хилээмэхэн» ООО-гой ахамад захирал Александра Зандаева онсолоо. 

«Хилээмэхэн» нэгэдэл 2004 оной январь һарада байгуулагдаһан юм. Тэрэ үедэ тэдэнэр хүлһэлһэн байшанда байгаа, тиихэдээ нэгэ хоногто 300 хилээмэ баридаг һэн.