Үхибүүдтэ-үнэтэ бэлэг

Һургуулида бэлдэлгын "Мойһохонууд" эмхи түрүүшын хүүгэдые хахад жэлэй саана  угтажа абаа һэн, теэд хорон хамшагай ехээр дэлгэрһэнһээ боложо,  нээлгын баяр ёһолол хойшолуулагдаа һэн.

Хүмүүжүүлэгшэд түрэлхидые болон айлшадые сэсэрлиг соогуураа ябуулжа харуулаа, хэшээлнүүдэй үнгэрхэ таһагуудта, хүгжэмэй болон тамирай танхимуудта оруулаа. Аятай зохид, үргэн һаруул таһагууд 3 мянга дүрбэлжэн метрһээ үлүү талмай эзэлнэ. «Мойһохонууд» хоёр жэлэй саана нээгдэһэн һургуулиин дэргэдэ оршоно. Һургуулида үнгэргэгдэһэн баярай жагсаалда һурагшад мүнөө үеын хэрэгсэлнүүдээр  юу хэжэ һураһанаа харуулаа.

- Үхибүүдэй аятай зохид оршондо һурахын тула ехэ  юумэн хэгдээ. Урган хүгжэхын оршон байгуулагдахадаа, арга боломжонуудшье үргэдэхэ. Мүнөө республикадамнай үшөө 16 һургуули баригдажа байна. Эдэ ганса шэнэ хананууд бэшэ, харин шэнэ түхеэрэлгэ хэрэгсэлнүүд, һуралсалай таһагуудай хангалта болоно. Үхибүүдэй өөрынгөө дуратай мэргэжэл шэлэхэ аргатай байхаар бүхы юумэн хэгдэнэ, - гэжэ Буряадай Толгойлогшо Алексей Цыденов тэмдэглээ.

450 һууритай һургуули «Болбосорол» түлэбөөр баригдаа.
Һургуулиин гурбан дабхартай байшан үхибүүдэй наһанай хэмжээнүүдээр хубаарилагдаһан таһагуудтай,  хэдэн блогуудһаа бүридэнэ. Эдеэ хоолой газар, баяр ёһололнуудай, суглаануудай, тамирай танхимууд, номой сан болон наадалгын газарнууд ехэл аятай зохидоор байгуулагданхай.

Хэшээлнүүд  мүнөө үеын бүхы эрилтэнүүдтэ харюусаһан таһагуудта үнгэрнэ. Дархалалгын ба урлалгын мастерскойнууд, эсхэлгын ба оёлгын, эдеэ хоол бэлдэжэ һургалгын таһагууд, уран зурагай болон мүнөө үеын компьютерна класс бүхы хэрэгсэлнүүдээр хангагданги.

- Һургуулиин нээгдэһээр манай үхибүүдтэ зохид  оршон байгуулагдажа, шэнэ арга боломжонууд бии болоо. Ганса һурагшадташье бэшэ ааб даа, багшанарташье иимэ хэрэгсэлнүүдээр хэшээлнүүдээ үнгэргэхэдэнь, өөһэдтэнь ямар һонирхолтой гээшэб. Бидэ шэнэ үеын планшедүүдые, интерактивна самбарнуудые хэрэглэнэбди, - гэжэ эхин классуудай  багша Марина Кулиева хөөрөө.

Шэнэ һургуулиин дэргэдэ стадион, футбольно, баскетбольно, волейбольно болон гимнастическа талмайнууд, тусхай хушалтатай гүйхэ харгынууд ба амаралгын газарнууд түхеэрээтэй.