Туһа үзүүлһэндэнь баяртайб...

Бүхэроссиин урилдаанай һүүлшын шатада 46 можо хизаарай 90 мэргэжэлтэд 9 шэглэлээр мүрысэжэ, бэлиг шадабарияа харуулха юм. Михаил Воробьёв хадаа “Хизаар ороноо шэнжэлэлгэ ба аяншалга” гэһэн шэглэлээр урилдаанда оролсохо юм. Тэрэ Буряад Уластаа Гран-при шанда хүртөө һэн гээд, хэлэхэ шухала. Ресурсна түбтэ Михаил Александрович 2013 онһоо хүдэлнэ. Юһэн жэлэй хугасаада тэрэ хэдэн һуралсалай программануудые зохёожо нэбтэрүүлһэн байна.

- Би өөрөө зүүн зүгэй түүхэ үзэдэг мэргэжэлтэйб. Манай элинсэг хулинсагууд яажа ажамидардаг байгааб, байра байдалынь ямар һэм гэжэ шэнжэлгэ хэхэ дуратайб. Мүн археологиин талаар ажал ябуулнаб. Энээн дээрэ үндэһэлэн, “Элинсэгүүдэй харгыгаар” гэһэн программа бэшээб. Иимэ хэшээлнүүдые үхибүүдтэ дурадхахадамни, тэдэ анхаралтайгаар шагнана, бүхы юумээр һонирхожо, хадуужа абана. Шэхэ хатуу эрэмдэг бэетэй хүбүүд, басагадта энэ хэшээлээ тааруулжа заанаб, - гэжэ Михаил Александрович хөөрэнэ.

Элдэб оршон байдалда зорюулагдаһан хэшээлнүүдые Михаил Воробьёв зохёожо, амжалтатайгаар бэелүүлнэ. Энэ шэнэ программа урдахи түсэлһөөнь гаража ерээ гээд хэлэлтэй.

- Хэдэн зуун, мянган жэлэй саана ажаһууһан хүнүүд ажабайдалаа яагаад зохёоноб гэжэ үхибүүдтэ хөөрэнэб. Энээн дээрэ үндэһэлэн, хуушанай аргаар яагаад гал носоохоб, уһа олохоб, ой модон соо хэрэглэхэ ажалай зүйлнүүдые тэрэ дороо хайшан гэжэ хэхэб гэжэ байгаад заанаб. Эдээнһээ гадна зүг бэдэрүүлжэ һурганаб. Юуб гэхэдэ, мүнөө сагай үхибүүд ой модон соо хаана урда захаб, хаана хойно тала байнаб гэжэ ойлгоногүй. Мүн аяншалгада гараад, майхан табюулжа заал һаа һурганаб. Эдэ бүгэдые үхибүүд гурбан жэлэй хугасаада үзэжэ гараха ёһотой, - гэжэ Михаил Воробьёв шэнэ программынгаа удхатай танилсуулна.

«Рейтинг выживания. Древние технологии» гэһэн программаарнь һуралсалһаа гадуур хэшээлнүүдтэ 40 гаран хүбүүд, басагад һонирхожо ябана. Мүн “Сердце отдаю детям!” гэһэн урилдаанда хабаадагшад, багшанар, шүүгшэд энээнииень үндэрөөр сэгнээ. Бүхэросиин урилдаанай Буряадта болоһон шатада Михаил Александрович түрүүлжэ гараа. Үшөө хоёр шата сэхэ хабаадалгагүйгөөр гаталаад, бүхэроссиин финалда хабаадаха эрхэдэ хүртэбэ гээшэ.

- Һургаһан олон үхибүүдни ажабайдалай хүнгэн бэшэ харгыда гараад, намдаа баярай үгэ хэлэжэ хонходоно, бэшэнэ. Багаханааршье тэдээндэ туһалһандаа, баяртай байдагби, - гээд, Михаил Воробьёв тэмдэглэнэ.